Read Batak Dairi Job 34 Bible Online

Job 34 - Batak Dairi bible

Job 34

¹Otang mpantas ngo kènè janah singgeddang radumen? Mula bagi, tangkas dengkohken karina ranangku èn.

³Ibettoh dèba ngo pangaen merasa mula ipangan iarusi ngo kata bijak mula idengkohken.

⁴Simasa èn kennah iperdimata nai rebbakken perèsoken mo kita.

⁵Idokken si Job, ‘Oda lot salahku, tapi oda uè Dèbata maing bakunè adil bangku.

⁶Idokdok ngo merluap aku, kumarna kudokken oda merdosa aku. Bagèndari mparah ngo ugahku tukasi pè oda mersalah aku.’

⁷Nung ngo idah kènè bagè si Job èn jelma? Pukpuk ngo dak irèhèi Dèbata.

⁸Lemmo ngo atèna merdengan dekket jelma durhaka janah meralè-alè dekket jelma merjaya.

⁹Idokken ngo, pellin magosia ngo mula nikelkelken mengulaken lemmo atè Dèbata.

¹⁰Kènè alè simpantasniasè, dengkohken mo. Bakunè nola mo Dèbata Siperkuasa maing siso toko?

¹¹Ibalesken ngo bai jelma i tosè mi pemahanna, ibaing ngo bana tosè mi pengelakona.

¹²Ukum Dèbata Siperkuasa oda maing kejahaten taba karina jelma ngo iberèken keadilen.

¹³Bai isè nai ijalo Dèbata kuasaNa? Isè meliniken dunia èn tabasa?

¹⁴Mula pè ipostep Dèbata kessah jelma janah ibuat balik kessah kenggeluhenna,

¹⁵ripas mo karina simenggormit simerkessah, janah jelma pè kembali abu bagè mulana.

¹⁶Asa, mula kalak singgeddang radumen ngo kono, peratè-atèken mo, pecingir mo pènggelmu janah dengkohken mo.

¹⁷Mada ngo dok atèmu salah nola Dèbata, siadil janah lubalang i? Mada ngo dok atèmu ncego atè Dèbata midah keadilen?

¹⁸Ihukum Dèbata ngo raja dekket perkuasa, mula jahat kalak i barang durhaka.

¹⁹Oda ngo ia menerrapi kan raja-raja, barang pè mengelebbèken kalak si kaya daripada kalak sincor oda merharta. Kumarna karinana ngo kalak i tinempaNa.

²⁰Tengah berngin pè, ndorok ngo sintempu matè kalak i karina. Ihukum Dèbata Perkuasa janah karina mo kalak i binasa; kalak lubalang pè, murah ngo iakap memunuhsa.

²¹Iperdatèken ngo nggelluh jelma idah ngo karina langkahna.

²²Oda lot bana gellap, barang bakunè pè bulitana, sindorok moniken jelma perdosa.

²³Oda pella itentuken Dèbata ketikana asa roh jelma mi kerunggunNa.

²⁴Oda pella irisiki barang ipemanat Ipetadi jelma simerkuasa janah singkatna ipebangkit.

²⁵Kerna ibettoh ngo barang kadè sinaing bakinenna; nai ipebalik janah igeppui mo kalak i bernginkenna.

²⁶Iparap ngo kalak i kumarna dosana i lebbè sinterrem ngo kalak i kenna hukumNa.

²⁷Kumarna oda iuèi kalak i lemmo atèNa janah oda isarihken kalak i karina perèntahNa.

²⁸Kalak i ngo memaing kekelsohen sincor siso merharta jadi sora tangis kalak idi idengkohken JAHOWA.

²⁹Mula sip sambing katè JAHOWA isè poda pang mengerèhèisa. Mula iboniken ia abèNa sada kalak poda lot ndorok menjupaisa.

³⁰Jadi oda lot gegoh karina bangsa lako menggerra ulang penèndes sijahat merkuasa.

³¹Alè Job, enggo ma ngo iaku ko dosamu bai JAHOWA? enggo ma ngo ibulabanken ko oda uè ko mengulaken dosa?

³²Enggo ngo ipidoken ko asa ituduhken kesalahenmu? Enggo ma ngo isumpahken ko petadiken ulah-ulahmu?

³³Mèter uè mo katèmu Dèbata menguèi nipergeddomu, enggo kessa oda iuèi ko nibaing Dèbata bamu? Bagèndari pè, kono ngo memutusken, oda aku. Dokken mo bakunè pendapetmu.

³⁴Karina kalak simpantas kennah tuhu nina kalak simbages nahu mendengkoh ranangku mendokken katana

³⁵ukum si Job mengerana tapi oda iantusi, janah katana oda merarti.

³⁶Mula niradumen kata si Job hanjar-hanjar ntangkas ngo katana i bagè rana perjahat.

³⁷Kesalahenna itambahi dèng dekket sada dosa; mengalo ngo ia taba Dèbata, dekket mengelèaisa dèng ma i hadeppenta.