Read Batak Dairi Job 36 Bible Online

Job 36 - Batak Dairi bible

Job 36

¹Dengkohken sinempas nai, janah sobar mo ko lot dèng sinaing kudokken merkitè Dèbata mbang ko.

³Mbages ngo nahungku; naing kugunaken i lako membuktiken adil ngo situmempa aku i.

⁴Oda ngo mengoto-ngotoi katangku ai kalak simpantas niasè ngo i lebbèmu.

⁵Mergegoh kalohon ngo Dèbata! Karinana ngo ibettohNa. Isè poda merlèa i penengenNa.

⁶Oda ibelli ndekkah nggelluh kalak perdosa, adil ngo ibaing taba karina kalak simpersah.

⁷Kalak bujur iperdimata, merkuasa ngo kalak i ibaing gabè raja-raja, gabè ipesangap kalak i soh sidekkah-dekkahna.

⁸Tapi mula kalak sinilanggu dekket rantè bessi, mpersuk kumarna pemaingna sendiri,

⁹nai dosa dekket ndates ukurna kennah ipacidah Dèbata.

¹⁰Idokken taba kalak i asa idengkohken sipesèngètNa janah menadingken kejahaten kalak i.

¹¹Mula ièkutken kalak i Dèbata janah menguèi tabasa, mènak mo nggelluhna janah nduma soh nggettap kessahna.

¹²Tapi mula oda uè kalak mendengkohken, matè mo kalak i ibas kemotoen.

¹³Kalak siso mertuhan dak ngo segat-segaten, tukasi pè ihukum JAHOWA ia, oda uè mengido pengurupen.

¹⁴Matè lejaen mo kalak i sinderrang posona, kumarna dom kinilèa ngo nggelluhna.

¹⁵Iajar Dèbata ngo jelma merkitè kinipersah, kinipersuk i ngo ibaing pesatdarkensa.

¹⁶Ipaluah Dèbata ngo ko ibas kepècetten nai, gabè ndorok irasai ko kèmènaken, janah dom ngo i mèjamu panganen.

¹⁷Tapi bagèndari tosè mi kejahatenmu, ijalo ko mo hukumenmu.

¹⁸Manat mo, ulang tertipu ko kerna riar sisip iberèken ulang ilalingken ko kumarna kekayaen.

¹⁹Sia-sia sambing ngo ko pingko-pingko mido urup, magosia karina kelejaen bak gegohmu.

²⁰Ulang ketedohken berngin sigellap, ai i ngo ketikana mago bangsa janah mersep.

²¹Jagaken mo, ulang tulihken mi kedurhakaen. Kinidersamu mertujuen asa tadingken kejahaten.

²²Èngèt mo, mbelgah kalohon ngo kuasa Dèbata. Lot dèng katèmu guru bagèsa?

²³Isè ndorok menentuken dalan baNa barang pang menuduhsa mersalah?

²⁴Dak terpoji ngo Ia kumarna sinibaingNa, janah kono pè patut ngo petèmbulkensa.

²⁵Karina kalak megidah sinibaingNa; tapi sada kalak poda lot mengarusisa.

²⁶Mermulia kalohon ngo Dèbata, oda terasak kita barang pè mengètong sadikè tahunNa.

²⁷Dèbata ngo mengabin laè i tanoh èn nai gabè hembun nai iobah nola gabè laè udan.

²⁸Ia ngo mencurahken udan i hembun i nai isiramken lako bai jelma manusia.

²⁹Isè poda bettoh-bettohen tah bakunè perkoser hembun bagi ma sora renggur i langit bekkas Dèbata merian.

³⁰Ia ngo menendangi suberri langit merkitè pelian, tapi ukum dangaen laut tong ngo gellap tuiten.

³¹Bagi mo caraNa Ia pehèdu-hèduken karina bangsa janah merèken bai kalak i pangaen meriba-iba.

³²Icekkak ngo pelian merkitè tanganNa janah ipasulak mencalit barang kadè dok atèNa.

³³Sora renggur tanda-tanda naing darèdè udan. Pinakan pè memettoh sapa-sipu nè mo angin.