Read Batak Dairi Job 37 Bible Online

Job 37 - Batak Dairi bible

Job 37

¹Udan darèdè maing atèngku mbiar dekket rentektekku bukbak gontar.

²Kènè karina dengkohken mo sora Dèbata; dengkohken mo renggur siremuar tan babahNa.

³Mi suberri langit kumasiksak pelianNa itenges ngo perkasNa soh mi punca dunia.

⁴Nai terdengkoh mo soraNa merderrem, sora purpar perkas dekket renggur; janah i tengah sora sipurpar i perkas merdessik calit-mencaliti.

⁵Kumarna perèntah Dèbata, kelengangen terjadi masa lègan siso ndorok niantusi.

⁶Ndabuh baho mi tanoh èn kerna perèntahNa; roh udan darèdè kerna suruhenNa.

⁷Ipettadi ngo jelma i mengula asa ibettoh kalak I tupung mahan bahaen ia.

⁸Bang binatang rambah cucuk mi lubang dekket liangna janah culèndung ibas asarna.

⁹I selatan nai mengembus angin topan janah i utara nai simbergoh mengeropan.

¹⁰Kessah Dèbata maing kimpal babo laè simbellang i iobah kembali ès gabè mpihir mo i.

¹¹Hembun batu ibaing sin laè janah hembun mercala-cala icuhayai pelian.

¹²Hembun mayap-ayap mi suberri dunia, mayap ngo kalak i mikè sambing kerna perèntah Dèbata.

¹³Iberèken Dèbata ngo udan lako memernekki tanoh, barang ma lako menghukum jelma; tapi nggèut ma ngo lako pacidahken bai jelma manusia hot ngo belgah ngkelleng atèNa soh sidekkah-dekkahna.

¹⁴Sip mo ko sigejap alè Job janah dengkohken mo da; perdatèken janah radumi kelengangen sinibaing Dèbata.

¹⁵Tahu ngo ko bakunè Dèbata memerèntah, asa merdebbet pelian i hembun idi nai?

¹⁶Tahu ngo ko bakunè permayap hembun i imo kerna kepandèen Dèbata sikelengangenken i?

¹⁷Tentu oda, pellin kekelsohen ngo ko kerna mukupen mula mengembus angin selatan.

¹⁸Ndorok ngo ipekimbang ko langit i bagè pemaing Dèbata janah ipekong bagè bessi tuangen barang kaca?

¹⁹Ajari mo kami bakunè patut dokenken nami taba Dèbata; oda lot ndorok sikupeterang kami, numar ngo pikiren nami.

²⁰Oda uè aku mido mengerana dekket Dèbata tah bakunè I nola dalanna memaing aku cilaka.

²¹Bagèndari langit mercala-cala gabè ncilo mata; ipepanting angin cuaca i merkitè penempulna.

²²Bagè cuhaya rumang emmas taridah i utara dekket kemuliaen JAHOWA pebengapken ukurta.

²³Mbelgah kalohon ngo kuasa Dèbatanta oda sanggup kita mendessingisa, ai dakdak jujur janah adil ngo ia; oda nung Ia mengkilang jelma.

²⁴I ngo kulih sebabna patut ipesangap barang isè sambing ia, ai kalak simengaku mpantas oda ngo isarihken ia.”