Read Batak Dairi Job 38 Bible Online

Job 38 - Batak Dairi bible

Job 38

¹Nai idokken JAHOWA mo ranana taba si Job ibas kaba-kaba nai bagèen:

²“Isè kono pana, asa pang meraguken kebijakenKu merkitè kata-katamu simoto janah rumar i?

³Bagèndari pè dempakken mo Aku mula daholi ko janah aloi mo sikukusoken èn taba ko.

⁴Tikan kuhanaken dunia èn enggo ngo ko lot? Mula tuhu ngo mbages nahumu, bagahken mo.

⁵Isè ngo menentuken sadikè bellang dunia? Isè ngo pekistangken tinali sibar-sibarna? Ibettoh kono ngo jababna?

⁶Bakunè ngo percènder pandak tanoh èn pajek ntegguh? Isè menggamparken batu persoki dunia èn ngkong,

⁷sinderrang rebbak merendè bintang-bintang siceggen dekket pengisi sorga mersurak sampang atè.

⁸Isè memètut pèntu lako memendar laut tikan merbuldak laè i beltek dunia èn nai?

⁹Aku ngo menudungi laut merkitè hembun meremmang dekket memalutisa merkitè gellap tuiten.

¹⁰Aku ngo menentuken biding laut karina dekket merkitè pèntu tergerruk Aku memendarsa.

¹¹NingKu mbangsa, ‘En mo balengna. Ulang lausi! Isèn mo galombangmu mergegoh i mengadi.’

¹²Alè Job, nung ngo idokken ko giam sikali, asa mbincar mataniari?

¹³Nung ngo ipasulak ko mataniari menjèmak tanoh èn dekket memaspasken perjahat i bekkasna ciboni nai?

¹⁴Sinterrang mahar pacidahken ntarar delleng bak napa bagè cap i tanoh dendang bak pengelempiten ibas sada jubah.

¹⁵Sinterrang mahar ncihursu bai kalak siso mertuhan janah mengambati kalak maing kekerasen.

¹⁶Nung ma ngo ko susur mi benna laut, soh mi danganna? Nung ma ngo ko merdalan-dalan i hatap laut raya?

¹⁷Nung ngo ituduhken dèba bamu pèntu pengkeruhen i lebbè-lebbè bekkas kematèen sigellap tuiten?

¹⁸Ndorok ngo ibettoh ko sadikè belang dunia? Aloi mo mula ibettoh ko ma.

¹⁹Ibettoh kono ngo i dikè nai roh sinterrang, janah i dikè ngo asal usul sigellap situhuna?

²⁰Ndorok ngo itentuken ko i dikè perkelangen gellap bak nterrang? barang pasulakken kalak i mulak enggo kessa dumatang?

²¹Tentu ndorok ngo ko, kumarna ko enggo tua-tua, janah enggo mo ko lot, tikala dunia èn hana.

²²Nung ma ngo ko menongkir langgih-langgihKu bekkas ès dekket udan batu,

²³sikupennep mahan keperluen tikala kesusahen, keperluen tikan geraha dekket perjuhapen?

²⁴Ibettoh kono ngo i dikè mataniari merbekkas? barang i dikè nai asalna angin kebincaren?

²⁵Isè ngo mengkurak parik dalan laè mula ndor udan dekket mahan dalan bai renggur bak pelian?

²⁶Isè ngo mencurahken udan mi rambah kelongoen dekket mi babo tanoh siso iiani jelma?

²⁷Isè ngo menampaki tanoh ngkerrah-kerring asa ndorok nola karina dukut-dukut mertunasi?

²⁸Lot ngo ndia bapa udan? Isè bapa laè silot i hembun?

²⁹Lot ma ngo ndia inang udan baho? Isè menubuhken hembun batu?

³⁰Isè pekellih laè kembali batu, dekket maing abè laut mpihir bagè batu?

³¹Ndorok ngo ipudun ko èkèt bintang Kartika? Barang italkasi ko langgu bintang Belantika?

³²Ndorok ngo iarak ko bintang i tikan mosinna, dekket bintang Biduk mbellen bak kèdèk itentuken ko perdalanna?

³³Ibettoh ko ngo hukum i langit simercala-cala? Janah ndorok ma ngo ibaing ko bagi i dunia?

³⁴Ndorok ngo isurakken ko perèntah taba hembun, dekket pasulakkensa asa iperroh bamu udan?

³⁵Dekket mula ipasulak ko perkas mencaliti, roh ngo ndia kalak i mendokken, “Uè, Tuan nami!”?

³⁶Bai isè nai ibettoh manuk-manuk belibis ndigan Laè Nil merginja? Isè magahken taba manuk jagur naing roh udan?

³⁷Simpantas dikè mo ndia ndorok memilang hembun dekket pebalikkensa gabè roh udan,

³⁸udan maing malket abu gabè merkimpalen dekket tanoh gabè mersada mersilekketten?

³⁹Ndorok ngo iburu ko pangaen singa dekket memessuri beltek anakna karina

⁴⁰mula culèndung kalak i ibas liang barang menggepgep ibas asarna?

⁴¹Isè mengurupi kak mula melèhè beltekna janah ngkabang mi sèn mi sadoi menulusi panganna? Isè ma ngo ndia mengurupi mula piak-piak anakna mido pangaen?