Read Batak Dairi Job 39 Bible Online

Job 39 - Batak Dairi bible

Job 39

¹Ibettoh kono ngo ndigan rigarung merdokar? Nung ngo iperdatèken ko balkih merdokar?

²Ibettoh kono ngo sadikè dekkahna ia melcik? Ndorok ngo ikira ko ndigan ia meranak?

³Ibettoh kono ngo ndigan ia memukung dagingna, lako menubuhken anakna?

⁴Tambah mbelgah bak mergegoh mo i rambah i anakna i; nai laus mo ia janah maknè balik mendahi inangna i.

⁵Isè paluahken kalodè meriar sinirambah i? Isè mengosari èkètna dekket mellisa misèn misadoi?

⁶Enggo Kuberèken bana rambah kelongoen mahan kandangna dekket tanoh terulang mahan bekkasna.

⁷Ndaoh ngo ia ibas kuta nai bak siramina isè poda ndorok pelemukken dekket maingsa mengula.

⁸Kadap ngo ia i delleng i menulusi komil panganna itulusi ngo bulung meratah i sidi gagatenna.

⁹Uè ngo ndia balkih mengulaken bahanmu? Uè ngo ndia ia gempang i kandang sinibahanmu?

¹⁰Ndorok ngo ndia ia ièkèti dekket iiring ko mengeruah tinggala? Ndorok ngo ndia ipasulak ko ia menisir sabahmu?

¹¹Ndorok ngo ndia iasangken ko gegohna simengiba-ngiba i, dekket isohken ko bana ulanmu mberrat i?

¹²Tok ma ngo kono bana lako pepulungken hasil jumamu, dekket merembah i mi langgihmu?

¹³Ngkapes ngo perngkaper kabeng manuk-manuk onta, tapi oda teralosa ngkabang manuk-manuk uo.

¹⁴I tanoh ngo menaruh manuk-manuk unta, nai itadingken; nai kersik i mo pepedasken naruhna asa merper.

¹⁵Oda ibettoh tah lot jelma mendedohsa barang binatang meriar i memerjatsa.

¹⁶Carana nidokdok ngo anakna i oda milikna oda ipikirken mula usahana magosia.

¹⁷Aku ngo memaingsa moto dekket lengah, oda Kuberèken bana pikiren dekket akkal.

¹⁸Tapi mula enggo kessa ia nderras lojang, talu ngo ibaing, kuda merpenunggang.

¹⁹Alè Job, kono ngo merrè gegoh bai kuda dekket buk tariti mulleh-ulleh i tengkukukna?

²⁰Kono ma ngo pasulakkensa mangkat bagè balang dekket asa merdengus ègungna mencubiari jelma?

²¹Ikaisi tanoh napa-napa ibagasen lolona, dekket mertuhu-tuhu ngo ia lojang mi bekkas geraha.

²²Oda tahu ia kadè lapaten buradan dekket mbiar; oda lot peddang memaingsa sondar.

²³Senjata sinikadang penunggangna, gumerincing bak merkillok kenna cuhaya.

²⁴Bagè burintingen ngo kuda i cènder; mula mersora terompèt oda tergongsa nè pellin jerjer.

²⁵Merdengus ngo ia gennep idengkoh sora terompèt i sindaoh nai enggo ianggoh bau geraha, mèter mo ia kumelaput. Idengkoh ngo sora lubalangna tikala menuratken perèntahna.

²⁶Iajari kono ngo keliki ngkabang mula laus ia mi selatan kabengna ngkèrbang?

²⁷Perèntahmu ma ngo siniuèen manuk-manuk rajawali sinderrang madèng ibahan asarna i delleng sindates i?

²⁸I babo delleng batu ngo ibahan asarna; punca batu sintajem i ngo ibaing bèntèngna.

²⁹I sidi nai mo idatèken mi sikulilingna matana dak mengentip menulusi panganna.

³⁰Idikè lot bangkè enggo i sidi ia janah daroh bangkè i mo ènumen anakna.