Read Batak Dairi Job 4 Bible Online

Job 4 - Batak Dairi bible

Job 4

¹Nai mengerana mo si Elifas, nina mo: “Alè Job, mengga ngo atèmu mengerana aku? Oda tergong aku mak mengerana.

³Ai enggo mèduk kalak ipeddahi kono kalak sindotè enggo ipergegohi kono.

⁴Ranamu pukpuk ngo pesampangken roka mengèkèi kalak sigeppah, ndotè bak sileja.

⁵Bagèndari iserpai bonek i ngo kono; tersengget ngo kono, janah putus asa.

⁶Otang bujur ngo ko taba Dèbata; otang oda ngo lot salah ibaing ko? Mula bagi patutna mo da tok ko janah ulang putus asa.

⁷Radumi mo, nung ngo kalak siso mersalah gabè idendenni cilaka bak kinipersah?

⁸Kubettoh ngo kerna kuperdatèken kalak simengula juma kejahaten dekket simenuanken bennih olpek bagè buah suan-suaen kennah merani cilaka dekket kesusahen.

⁹Bagè kalisungsung ngo laga Dèbata mengkeriken kalak gabè tompet.

¹⁰Kalak jahat mengoga dekket mengaum codi mi singa kalak i menderru. Tapi ipesip Dèbata ngo kalak i janah icuaki ngo èpenna i.

¹¹Matè ngo kalak i bagè singa sikurang pangaen dukak-dukakna pè mambur mèrap oda lot bekkasna merian.

¹²Nung ngo sada alamat roh bangku bagè hanjar ikosikken mi pènggelku.

¹³Gabè terganggu perpeddemku ibaingken bagè ternipi camber i gellap bulita.

¹⁴Tersengget mo aku janah mbiar dagingku menggirgir kerna gontar.

¹⁵Angin melancè menempul abèngku nai kèkè mo pendurungenku.

¹⁶Lot ngo kalak bagè cènder i hadeppenku kutengen, tapi oda tinandanku. Nai kudengkoh mo lot sora maing simelongo gabè meriah,

¹⁷‘Lot ngo ndia jelma oda mersalah i hadeppen Dèbata? Lot ngo ndia oda mertikas ia i penengen situmempasa?

¹⁸Salang bagahen Dèbata sini sorga oda ngo ipercayai ia. Salang malaèkat-malaèkatNa lot ngo idapet kesalahen dekket tikasna.

¹⁹Makinsa nola mo sinihanaken merkitè tanoh mpèsket sinitempana merkitè abu ndorok iledda bagè ngitngit.

²⁰Nggelluh ngo ia mula siceggen ari nai matè mak terbettoh mula bon ari oda nè mo èngèten ia soh mi podi ari.

²¹Nai mersep mo karinana milikna matè mo ia oda lot kepantasenna.’