Read Batak Dairi Job 41 Bible Online

Job 41 - Batak Dairi bible

Job 41

¹Ndorok ngo itangkup ko buaya mbellen pellin merkitè kail ikan? Ndorok ngo itambat ko dilahna i dekket merkitè tinali sambing?

²Ndorok ngo ibaing ko ingkir-ingkir mi ègungna barang pè kait-kait bessi mi isangna?

³Nggèut ngo ndia ia mendokken bamu asa ipaluah ko ia? Barang merarih ia dekket ko, mengido masèh atèmu bana?

⁴Nggèut ngo ndia ia menguèi kono, dekket merpadan asa dakdak ia mengkebasi kono?

⁵Nggèut ngo ndia ia ièkèti ko bagè manuk-manuk piaraen, sipesennangken ukur naposo daberru?

⁶Nggèut ngo ndia ia ipedèa-dèa perikan-ikan dekket ipella-pellaken bai kalak pertiga-tiga?

⁷Ndorok ngo ijuluk ko kolingna merkitè kujur sitellu mata barang ianjong kono dekket kujur menembus takalna?

⁸Sikali sambing pè ia igerrit kono janah oda nèngè iulaki kono; oda terlupaken kono perduhamaen i soh sidekkah-dekkahna.

⁹Barang isè mengidah buaya mbellen, kennah mbiar janah pangsan.

¹⁰Melaga ngo ia mula idungoi i pedemenna nai sada kalak poda pang cènder i lebbèna i.

¹¹Isè pang menjuhapsa mak ia nola cilaka? Isè poda sanggup i dunia èn maing bagi tabasa.

¹²Dengkohken asa Kusukutken tersèngèt buaya mbellen i, tersèngèt gegohna dekket mendè bentuk badanna i.

¹³Isè poda terbaingsa mengeribak baju ruarna barang menèmbuk baju perang sinipakèna.

¹⁴Isè ndorok memuka muncungna sintegguh i sin èpenna sintajem kalohon i?

¹⁵Bagè tambeng-tambeng tersusun, imo gurungna lekket rapet, bagè batu mpihirna.

¹⁶Mertindih-tindih ngkong iangit angin poda ndorok mbengket.

¹⁷Tambeng-tambengna i ntegguh pesangkut rantè gabè oda ndorok tersirang nè.

¹⁸Mula barcihen buaya mbellen i, bagè karuar kumeritik api matana ngkennel bagè permbincar mataniari.

¹⁹Dilah api merdeggup-deggup i babahna nai; sikulilingna mermastaken bunga api.

²⁰Cèmber mercèmpul arap ègungna, bagè cèmber sebban ntaptap i terruh belanga.

²¹Kessahna maing lakat rara; karuar ngo lakat api arap babahna.

²²Sun mo ntegguh tengkukukna, gabè karina buradan i hadeppenna.

²³Oda lot ndoyak ipas kolingna; oda terpecah kumarna mpihirna bagè waja.

²⁴Ukurna ntegguh bagè batu mpihir, oda nung bimbang ntegguh bak mpihir bagè batu penggilingen.

²⁵Mula kèkè ia, jelma simergegohna pè murtut ma mèter ndotè mo kumarna buradanna.

²⁶Oda lot peddang sindorok mengugahisa; kujur, panah barang pantem-pantem oda sanggup maing ncio tabasa.

²⁷Bessi pè iètong ngo dosken dukut termelèahen janah tembaga pè bagè permoh kayu dabanen.

²⁸Oda lot panah sindorok paluahkensa; batu sinikebekken tabasa dosken ronci sambing pengakapna.

²⁹Palu-palu iètong ngo sirambar bulung singkerrah-kerring; tertaba ngo ia mula lot kalak simengkincirken pantem-pantem.

³⁰Sisik beltekna bagè beliung ntajem pucukna. Bagè dupdup ngo ipais bak ibellah kubangna.

³¹Igaru ngo laut i gabè tosè laè gurgur; bagè saruam mermasak minak merkupkup gumeddek-dedek.

³²Itadingken ulbas tapak nèhèna mercala-cala; laut iobah kembali kupkup mbulan rupana.

³³I babo tanoh èn oda lot bagèsa; sinihanakenna siso mettoh mbiar ngo ia.

³⁴Binatang simahantuna pè merlèa ngo i matana i karina binatang buas pè, ia ngo rajana.”