Read Batak Dairi Job 42 Bible Online

Job 42 - Batak Dairi bible

Job 42

¹Nai ialoi si Job mo JAHOWA, “Kubettoh ngo alè JAHOWA, kono ngo Simerkuasana; Ndorok ngo ibaing ko barang kadè sambing.

³Ikusoken kono bangku kasa pang aku oda mengketoki kepantasenMu keppèken aku sendiri oda tahu. Kuranaken ngo tersèngèt siso kuantusi tah kadè dèba i sikelengangenken.

⁴Idokken kono ngo asa kudengkohken mula mengerana Ko, janah kualoi mula mengkuso ko,

⁵Arnia pemettohku tersèngèt Ko pellin kudengkoh arap rana ndèba, tapi bagèndari kutandai Ko merkitè pehadep abè.

⁶Kumarna i ngo asa mèla aku mernèngèt karina katangku janah peselsel ngo aku ningan kundul i babo cirabun bak abu.”

⁷Enggo kessa pul mengerana dekket si Job, idokken JAHOWA mo mbang si Elifas, “Melaga ngo aku taba ko dekket taba denganmu sidua kalak i, kumarna oda tuhu rana ndènè tersèngèt Aku. Tapi ukum naposongKu si Job oda ngo bagi.

⁸Asa, buat mo bagèndari pitu lembu tonggal dekket pitu biri-biri tonggal, nai dahi kènè mo si Job. Nai pèlèken kènè mo i karina mahan pèlèen situtungen bai diri ndènè. Si Job mo menodipken kènè janah sodipna ngo Kudengkohken. Oda pella kupemèla kènè, tukasi pè nemmu enggo patut kenna hukum kènè. Oda iranakèn kènè situhuna tersèngèt Aku, keppè si Job iranaken ngo.”

⁹Nai ibaing si Elifas, si Bildad dekket si Zofar mo bagè sinidokken JAHOWA i, janah idengkohken JAHOWA ngo sodip si Job.

¹⁰Nai enggo kessa isodipken si Job denganna sitellu kalak i, nai mengolihi bèak nola mo ia ibaing JAHOWA janah iberèken bana dua kali lempit daripada silot bana arnia.

¹¹Karina kaka bak turang si Job, dekket karina tinandanna arnia, roh ngo mendahisa, nai rebbak merpèsta gohon-gohon mo kalak i i bagesna. Idokken kalak i ngo, dekket ia bonek kemulihken karina kinipersuk sinipesempa JAHOWA tabasa, janah iapoi kalak i mo ia. Karina ngo kalak i merrèken riar dekket sada cincin emmas bai si Job.

¹²Ipasu-pasu JAHOWA ngo si Job merlempit ganda ipas nggelluhna sitadingna, mertimbangken sinderrang madèng sempa bana simasa i. Lot ngo pinakan si Job 14.000 kambing biri-biri, 6.000 unta, 2.000 lembu dekket 1.000 kalodè.

¹³Tubuh ngo anakna pitu kalak dekket berruna tellu kalak.

¹⁴Berru situaen gerarna si Jemima, sipeduaken si Kezia janah siampun-ampun si Kerenhapukh.

¹⁵I suberri nagerri oda lot simerbaju bagè mebrru berru si Job sitellu kalak i. Terolih perbagien ngo kalak i i harta bapana, dos dekket perbagien turang kalak i.

¹⁶Enggo kessa bagi nggelluh dèng ngo si Job seratus empatpuluh tahun nai, gabè sanga ngo idah kempu-kempuna soh mi kempuntèna bak kempuninina.

¹⁷Nai matè mo si Job ibagasen umur nggeddang kalohon.