Read Batak Dairi Job 5 Bible Online

Job 5 - Batak Dairi bible

Job 5

¹Dilo-dilo mo ko alè Job, lot ma ngo mengaloi? Bai malaèkat siapai nai ngo ipido ko pengurupi?

²Pellin kalak simoto ngo kessa matè kumerna ncio atèna.

³Nung ngo kuidah kalak simoto nggelluhna tengennen dak ngo toko. Tapi mèter sintempu kusumpahi bekkasna merian.

⁴Nai dukak-dukakna oda nung terolih pengurupien ai oda lot nè membèlasa i perhukumen.

⁵Barang kadè iperani kalak i i jumana kerri ipangan jelma simemèlè beltekna. Salang pagè silot ibas rambah lunglang kerri ipangan jelma kumarna rapar. Karina harta dekket kinibèakna itakiken kalak simbara matana midah harta.

⁶Oda ngo i dunia èn nai rohna kejahaten i oda ma ngo i tanoh èn nai rohna kesusahen i.

⁷Oda ngo! Tapi bai jelma i sendiri nai ngo roh cilaka mi dirina, tosè bagè perkeritik api roh i apina i nai.

⁸Ukum aku kin ngo bagè kono taba Dèbata ngo aku dilo-dilo. Mendahisa mo aku mengadu dekket menerahken simasa bangku.

⁹Soh mo belgahna pemahan Dèbata oda tuk pikirenta mengeradumisa. Tanda kelengangen sinihanakenNa oda merkerri-kerrien bak oda terbilangen kita.

¹⁰Roh ngo ibaing udan mi dunia èn gabè merlaè mo juma dekket jampalen si nitanoh èn.

¹¹Ia ngo Dèbata sipedatesken kalak simerlèa dekket sipesennangken kalak sindersa.

¹²Isondati ngo taki-taki macik, itogongi bak itangkup ngo kalak sicardik gabè sondat mo karina sura-surana kalak sibagidi mo itipu akkal-akkalna.

¹⁴Isangkemmi remmang ngo kalak i tikan mahar dadap-dadap bagè tikan gellap.

¹⁵Tapi Dèbata ngo paluahken kalak sincor ibas kematèen i nai kalak merlèa ibas perkilangen nai.

¹⁶Bagèndari lot ngo harapen nola bai kalak siso merharta. Janah kalak perjahat sip oda mengerana kumarna enggo ipekko Dèbata babahna.

¹⁷Lot dèng ngo tokona mula ipesèngèt Dèbata kono ulang mo mendellè mula igerra kono.

¹⁸Kumarna mula Dèbata simenakiti Ia nola ma ngo simendauni. Janah mula tanganNa memekpekki tong ma ia mengaluni mengolihi.

¹⁹Mula lot bahaya mengasupi dakdak ngo kono ipaluahi.

²⁰Mula masa pè lèhè mbellen, ukum ko oda matè mak mangan. Mula purpar pè geraha ntengam i mènak ngo kono ipas kematèen i nai.

²¹Ijaga ngo ko ulang kenna asup bak ajar latlat isimbaki kono ngo cilaka oda pella buradan.

²²Mula kekejamen dekket lèhè sempa sobar ngo kono ninganna tertaba. Oda ngo kono mbiar barang buradan mula roh pè binatang naing menjerngem.

²³Juma siniulamu oda merbatu binatang meriar oda menjerngemmu.

²⁴Mènak ngo ko merian i undung-undungmu janah mula ibilangi kono pinakamu i sidi ngo karina, oda kurang milikmu.

²⁵Pinemparmu oda terbilangen bagè buè dukut sinijampalen.

²⁶Bagè pagè ntua, iperani tikan masana kono pè tong nggelluh bak mergegoh soh tua-tua.

²⁷Alè Job, kami enggo memerèso i karina. Tuhu ngo kata i, jalo mo i bak radumi da.”