Read Batak Dairi Job 6 Bible Online

Job 6 - Batak Dairi bible

Job 6

¹Nai ialoi si Job mo, “Ukum itimbang bonek arsakku i,

³pasti botongen dèng ngo i daripada kersik i laut raya. Jadi ulang kènè lengang mula lot ranangku kurang seppè janah rudu-rudu.

⁴Panah Pergegoh sisotercodi i menèmbak dagingku èpuhna merdalan mi suberri rembagangku. Kinimahantu Dèbata sun mo maing rembekbekken pusuh menjuhap aku bagè tenterra musuh.

⁵Kalodè merlolo atè mula iberrè komil menguda bagi ma ngo lembu mula iberrè gagatenna.

⁶Tapi pangaen ndèngap, isè uè kipangansa? Bakunè mo simbulan tinaruh, lot rasana?

⁷Oda uè aku menjamah i moyang atèngku mula kupangan i.

⁸Kasa oda uè Dèbata mendengkoh sodipku? Kasa oda iperdatèken dilo-dilongku?

⁹Uè mo nemmu Dèbata mengeledda aku. Uè mo nemmu Ia memunuh aku.

¹⁰Idi mo bangku merumangken pengapoen; nai gabè tumatak mo aku tikan kepersuken. Karina perèntah Dèbata Simbadia kalohon enggo kuuèi janah dak kuperdatèken ngo i.

¹¹Kadè mo lot gegohku asa nggelluh dèng aku? Kadè sikuharapken asa sèkel ndekkah nggelluh aku?

¹²Lot pana bagè ntegguh batu badanku èn? I tembaga nai kin pana dagingku èn?

¹³Enggo kerri gegohku menulusi pengurupien; ukum bangku oda lot nèngè pertolongen.

¹⁴Ibagasen kinipersuk bagèen i kuharapken ngo alè-alè siburju. Tah tong dèng ma setia aku barang tah mada ngo enggo menadingken Pergegoh Sisotercodi.

¹⁵Tapi ukum kènè, alè dengan oda keppè kettoken, bak oda terasangken. Tosè ngo kènè bagè baruren sienggo marsak laèna kemulihken oda roh udan mi dunia.

¹⁶Codi ngo kènè bagè laè nong oda menjarir kumarna isangkemmi ès bak laè siso marir.

¹⁷Sintempu mula roh mosim leggo baho dekket ès mersep oda terbettoh. Baruren laè gabè gorang-garing oda nè merlaè janah kerrah-kering.

¹⁸Laling perdalan-dalan tikan menulusi laè kadap kalak i i padang gurun, gabè matè.

¹⁹Perdalan-dalan i Syeba dekket i Tema nai menulusi laè i janah mengharapkensa.

²⁰Tapi harapen kalak i dungna sia-sia i biding baruren siso lot laèna.

²¹Tosè bagè laè i mo kènè alè dengan-denganku surut jah sondar mo kènè, kumarna mbiar midah kinipersukku.

²²Kasa? Nung pana kupido barang kadè bamu? Barang kupasulak kènè menisip kalak lako bangku?

²³Nung pana kupido asa ipaluah kènè dekket itebbus bai musuh nai siso mermasèh atè?

²⁴Mula bagi, ajari mo aku, tuduhken mo kesalahenku. Nono pè aku, ninganna mendengkohken ranamu.

²⁵Rana ipas peratèen nai, pepalumken atè, tapi katamu luap, oda kadè artina nè.

²⁶Karina ranangku idokdok kènè bagè angin sambing kessa; sia-sia ngo ialoi kènè aku sienggo putus asa.

²⁷Otang anak melumang, itendungi kènè ngo nasipna? Iselbuh kènè ngo alè-alè ndènè asa kènè gabè kaya.

²⁸Oji mo, perdatèken kènè lebbè aku; gabè luap ngo aku dok atèmu?

²⁹Ulang kènè maing mak adil, satdar mo da. Ulang aku rèhèi kènè, tuhu ngo aku oda salah.

³⁰Mada ngo dok atè nde, aku merluap oda ne ndorok kubijaken simerandal bak simeroha?