Read Batak Dairi Job 9 Bible Online

Job 9 - Batak Dairi bible

Job 9

¹Tapi ialoi si Job mo, “Tuhu, kubettoh ngo, ranamu i oda salah. Tapi, bakunè mo pemaing jelma perkara mengalo Dèbata dekket menalukensa?

³Ipas seribu kuso-kuso ibaing Dèbata, sada poda teraloen jelma manusia.

⁴Ukum Dèbata i bijak kalohon janah merkuasa; isè mo ndorok tahan mengalosa?

⁵Iompat Dèbata ngo delleng oda pemettohen jelma nai ipebalik ngo i kumerna laga bak gerrah atèna.

⁶Dèbata ngo maing rènur mendegger tanoh èn dekket tihang pandak dunia tumuyu-tuyu ndegger.

⁷Tergerra Dèbata ngo ulang mbincar mataniari tikan siceggen, dekket oda paduèken bintang mercuhaya tikan berngin.

⁸Ipekimbang langit oda pella lot mengurupi; idedoh-dedohi gurung naga i laut i.

⁹Ibahan ngo nuhnuhen bintang i Selatan langit i bagi ma bak bintang Perlambuk, bintang Metmet bak bintang Mencari.

¹⁰Oda teradumen kita karina nihanakenNa, oda terbilangen kita kelengangen sinibaingNa.

¹¹Merdalan ia i lebbèngku, tapi oda idah matangku; mentas ia i gembarku, tapi oda terasa bangku.

¹²Mula Ia mengerampasi, isè pang menggerasa? barang berrani mengkuso tabasa, ‘Oè, naing merkadè Ko pana?’

¹³Oda ibekkem Dèbata pungur dekket lagaNa; naposo si Rahab pè patu ngo baNa.

¹⁴Nai, bakunè mo terbaing aku mengalosa? Dekket kata bakunè mo ningku menjababsa?

¹⁵Mula pè aku oda mersalah, kadè mo terbaing aku, laènken mido masèh atè Dèbata simenghukum aku?

¹⁶Tukasi pè ialoi mula pingko-pingko aku, ragu ngo aku, tuhu ngo ndia uè Ia mendengkoh sorangku?

¹⁷Ipuyu ngo aku ibas angin topan, itambahi ngo kinipersukku oda meralasen.

¹⁸Oda ipaduè aku kumessah giam sigejap; makin merdapet-dapet ngo ibaing simpagit siso tersekkat.

¹⁹Kennah ngo ndia aku mengadu gegoh dekketsa? Tapi tengen mo, mahantuna i gegohNa! Mula pè kubaing bana gugaten, isè pang mendilosa mi kerungguen?

²⁰Setia ngo aku janah oda mahanken dosa, tapi babahku bagè mengeruapken balikna nola; gennep kata siterruap i bibirku, bagè cara menalahken.

²¹Oda ngo aku mersalah, tapi oda i kusarihken nè enggo bosan aku nggelluh. Oda nè perlu bangku barang kadè simersalah bak sibennar, dos ngo nasipna; rasken ibinasaken Dèbata ngo duana.

²³Mula matè sintempu kalak siso merdosa, pellin tertaba sambing ngo Dèbata.

²⁴Enggo isohken Dèbata tanoh èn bai jelma durhaka, janah sigantung puhpuh pè enggo pètung karina. Dèbata ngo maingken i karina mula oda Ia, isè nola mo gia?

²⁵Nderras ngo aringku merlojang nai mersep mo oda mengerasai sennang.

²⁶Bagè bungki merlayar, kerri nggelluhku i nderrasna bagè nderras keliki susur menèmbuk panganna.

²⁷Mula naing tercèrem aku bak kumerakkak tertaba mula kuoji mengelupaken karina sindersa gabè roh ngo arsakki mengolihi, menjalangi aku kerna kubettoh dak isalahken Dèbata ngo aku.

²⁹Asa, mula bagidi, oda kupikirken nè i?

³⁰Oda lot sabun sindorok menasaken dosangku i.

³¹Dèbata ngo memennem aku mi hatoren bak olesku mendokken aku sikemoyangenken.

³²Ukum manusia kin ngo Dèbata i ndorok ngo kualoi Ia; nai menghadep mo kami mi kerungguen lako mendungi karina persilisihen.

³³Tapi oda lot bai nami jaksa sindorok mengadili kami sidua.

³⁴Ipetadi Dèbata mo nemmu menghukum aku janah ndaoh mo pungurna ulang mengenNa bangKu.

³⁵Oda buradan aku midahsa janah kudokken bagèndari kerna kutandai ngo perukurenku sendiri.