Read Batak Dairi Psalm 10 Bible Online

Psalm 10 - Batak Dairi bible

Psalm 10

¹Kasa Kono ndaoh alè JAHOWA janah ciboni tikan sessak kami?

²Merdengan sombong ngo kalak perjahat menèndes kalak sincor; belli mo kalak i tersengkik ibaing aringna sendiri.

³Kalak jahat membual tersèngèt jahat sinipergeddona, kalak nahaka menumpahi bak menulak JAHOWA.

⁴Kalak perdosa oda paduli taba JAHOWA, kumerna ndates ukurna oda iètong lot Dèbata.

⁵Merhasil ngo usaha kalak perjahat karina; oda itandai barang pè iantusi patien JAHOWA janah melèas ngo ukurna midah karina alona.

⁶Nina ibagasen ukurna, “Oda gagal aku, janah usur-usurku bagè kalak nggelluh siso jahat.”

⁷Iempet ngo menumpahi, mengasup dekket menipu rana-ranana dom sekkil dekket kejahaten.

⁸Ciboni ngo ia i gennep kuta naing memunuh kalak siso mersalah. Codi bagè singa ngo ia mengerimrim i balik rambah mengintè-ngintèken kalak siso mergoldè. Iambat ngo kalak sincor i bekkas melongo, menjerngemsa janah menaransa laus.

¹⁰Ipurun bana, kebbas lako menjerngem; itulpasken ngo kalak merkitè paksa.

¹¹Dok atèna ngo, “Enggo lupa Dèbata janah oda nèngè mendatèken; terrus mo oda idah aku.”

¹²Kèkè mo ko, alè JAHOWA, hukum mo kalak perjahat. Engèt mo kalak sitertèndes.

¹³Kasa kalak perjahat dak tong mengelèai Dèbata, janah dok atèna oda ihukum Dèbata ia?

¹⁴Tapi idah Kono ngo ia idatèken kono ngo kesusahen dekket kinidersana, janah dak kono ngo kebbas mengurupi. Kalak siso mergoldè menohken dirina baMu, dakdak ngo iurupi ko kalak sincor.

¹⁵Taluken mo kuasa kalak perjahat bak kalak durhaka; hukum mo kalak i kemulihken uja-ujana soh jerra kalak i ma.

¹⁶JAHOWA ngo memerèntah soh sidekkah-dekkahna; bangsa-bangsa siso menandaisa kennah salpun i tanohNa nai.

¹⁷Alè JAHOWA, idengkohken kono ngo sodip kalak simerlèa janah petegguhken ukur kalak i.

¹⁸Iampini ko ngo perkara anak melumang bak kalak sitertèndes asa ulang lot kalak simengasup kalak i.