Read Batak Dairi Psalm 102 Bible Online

Psalm 102 - Batak Dairi bible

Psalm 102

¹Sodip kalak ndersa tikan ledja janah kekelsohen taba JAHOWA.

²Alè JAHOWA, dengkohken mo sodipku, katerra pè sakat mo dilo-dilongku baMu.

³Ulang tondalken aku mula tupung susah aku. Dengkohken mo mula dilo-dilo aku, janah mènter aloi mo aku.

⁴Mersep ngo nggelluhku bagè cèmber; nggara tulan-tulanku bagè api.

⁵Ngkoltè aku bagè dukut males, janah oda tellap mangan.

⁶Nggang kaloen ngo pendeherrengku; pellin koling-koling nai ngo memalut tulan-tulan dagingku.

⁷Codi bagè manuk-manuk enggang sini padang gurun ngo aku, bagè lengkupa i babo punggur.

⁸Oda ndorok aku terpeddem, bagè manuk-manuk kelongoon i babo sapo.

⁹Terrus ari musuh mengelèai aku; gabè sumpah ngo gerarku, ibaing kalak simelaga mbang aku.

¹⁰Cirabun ngo kupangan sikira roti, ènumenku mersakkor èluh,

¹¹kumerna Enggo icukung janah iambongken kono aku ibas lagaMu singgerger i.

¹²Memellus ngo nggelluhku bagè lèndung tikan ciboen; gabè males ngo aku codi bagè dukut.

¹³Tapi ukum kono, alè JAHOWA, Raja soh mi sidekkah-dekkahna, tong èngèten turun-tumurun.

¹⁴Kèkè nola mo kono janah mermasèh atè taba Sion, enggo dapet katikana lako mermasèh atè tabasa.

¹⁵Kumerna naposo-naposoMu mengkekelengisa, tukasi pè enggo merentuh ia. Masèh ngo atè kalak i tabasa, tukasi pè enggo gabè abu ia.

¹⁶Ikebiari bangsa-bangsa mo Kuasa JAHOWA; janah ikebiari karina raja ketunggungenNa,

¹⁷mula ipejengjeng JAHOWA nola Sion mengolihi, janah roh ibagasen ketunggungenNa.

¹⁸Dak dengkohenna mo sodip bangsaNa mpersuk i, janah oda menulak pengidoen kalak i.

¹⁹Suratken mo karina pemakin JAHOWA taba cundut silako roh, asa bangsa siso itubuhken dèng dekket memojisa.

²⁰Menatap ngo JAHOWA i bekkasNa ndates i nai, i sorga nai Ia menengen mi tanoh èn

²¹lako mendengkohken kelsoh kalak sikurungen dekket paluahken kalak sinihukum matè.

²²Nai iberritaken mo gerarNa i Sion, janah dak ipoji mo Ia i Jerusalem,

²³tikan mertumpu bangsa-bangsa dekket kerajaen-kerajaen lako menguèi taba JAHOWA.

²⁴Italpekken JAHOWA ngo gegohku tikan poso dèng aku, janah pejopokken umurku.

²⁵Nai ningku mo, “Alè Dèbata ulang sintak kessahku i pertengahen nggelluhku.” Alè JAHOWA, nggelluh ngo ko soh sidekkah-dekkahna,

²⁶arnia ihanaken Kono ngo tanoh èn; langit pè tanganMu ngo memahan.

²⁷Karinana idi lako salpun, tapi ukum Kono tong ngo lot; karinana idi lako malè bagè oles. Iambongken Kono ngo i bagè baju mumuk, nai salpun mo i karinana.

²⁸Tapi ukum Kono dak tong ngo dos, oda merpunca nggelluhMu.

²⁹Sennang mo nggelluh usur-usur nami, janah mènak i pengkelungkumiMu.