Read Batak Dairi Psalm 103 Bible Online

Psalm 103 - Batak Dairi bible

Psalm 103

¹Bai si Daud nai. Poji mo JAHOWA, alè tendingku, janah nasa ukurku, poji mo gerarNa simbadia i.

²Poji mo JAHOWA, alè tendingku, ulang lupaken karina mendè basaNa!

³Ia menasa karina dosamu, pemalumken karina sakitmu,

⁴ia paluahken kessahmu i pendèban nai, merrèken mertinèncuk bamu kelleng bak masèh atè.

⁵Ia pepulakken nggelluhmu dekket mendè basa, gabè dak poso kono idahen bagè manuk-manuk rajawali.

⁶JAHOWA ngo pedalanken hukum dekket ketègerren bai karina kalak sitertèndes.

⁷Ia ngo memagahken takiNa bai si Musa dekket karina pemakinNa bai bangsa Israel.

⁸Kerna permasèh atè janah perkelleng atè ngo JAHOWA, melaun melaga janah permasèh atè mbuè.

⁹Oda ngo pukpuk menergangi ia, janah oda melaga soh mi sidekkah-dekkahna.

¹⁰Oda ngo ihukum kita rembang mi dosanta, barang memalesken banta rembang mi kesalahenta.

¹¹Tapi bagè dates langit i babo tanoh, bagi ngo belgahna masèh atèna bai kalak simenguèisa.

¹²Bagè daoh kebincaren i kesunduten nai bagi ngo daohna iambongken dosa-dosanta.

¹³Bagè sada bapa mengkekelengi dukak-dukakna, bagi ngo JAHOWA mengkekelengi kalak simenguèisa.

¹⁴Kerna ibettoh JAHOWA ngo ipas kadè nai kita itempa, ièngèt ngo kita ènda manihan abu.

¹⁵Sinempas ngo nggelluh jelma bagè dukut-dukut; ngkerbang ngo ia bagè bunga sinijuma;

¹⁶mula isempul angin, mago mo ia, salang bekkasna pè oda nè terbettoh.

¹⁷Tapi tong ngo ikekelengi JAHOWA kalak simenguèisa, janah turun-tumurun ngo mendè basana

¹⁸bai kalak simencèkèp bagah-bagahNa, janah dak tong mengulaken perèntahNa.

¹⁹JAHOWA ngo merèntah i sorga, Ia ngo raja merkuasa i babo karinana.

²⁰Poji mo JAHOWA, kènè alè malaèkat-malaèkatNa simergegoh, simendengkohken dekket simengulaken perèntahNa.

²¹Poji mo JAHOWA, kène-alè karina pengisi sorga, karina naposoNa simengulaken sinikelemokenNa.

²²Poji mo JAHOWA, alè karina tinempa i suberri aur kuasaNa. Poji mo JAHOWA, alè tendingku!