Read Batak Dairi Psalm 104 Bible Online

Psalm 104 - Batak Dairi bible

Psalm 104

¹Poji mo JAHOWA, alè tendingku! Mahanggana Kono, alè JAHOWA Dèbatangku! Merpakèen merkemeddu bak kemuliaen ngo kono

²janah merlilitken cuhaya. Kono ngo pekimbangken langit bagè undung-undung,

³janah memajek BagesMu i babo laè i langit, hembun ibakin Kono kurètaMu, ipasang Kono ngo kabeng angin.

⁴Angin ibakin Ko pasulakkenMu, janah pellian perkebbasMu.

⁵Ntegguh ngo tanoh èn ipajek ko i dangaenna, asa oda ndorok mogot-ogot soh sidekkahna.

⁶Ibaluti kono ngo i dekket laut raya, laèna mengeremrem pucuk-pucuk delleng.

⁷Tikan isenggak kono, menjarir mo laè i, marir nderras kalohon kerna geruhguh soraMu.

⁸Menjarir ngo laè memellus delleng-delleng mi napa, mi bekkas sinipehantarmu bana.

⁹Itentuken kono ngo baleng siso ndorok lausenna, asa ulang balik mengeremrem tanoh èn.

¹⁰Ko ngo maing muldak-uldak laè mul i napa-napa, laè kèdèk-kèdèk menjarir i kellang-kellang uruk-uruk,

¹¹lako memerrè mènum karina binatang sinijuma, dekket pepalumken muas balkih-balkih sinirambah.

¹²I gembarna manuk-manuk memahan asarna; kadikdak kalak i i kellang-kellang bulungna.

¹³Idurusken kono udan i langit nai mi delleng, idomi sinihanakenmu ngo tanoh èn.

¹⁴Ipeturah kono dukut-dukut bai pinakan, janah bai jelma mermatcam bagè suan-suaen. Nai ndorok mo ia menuan suan-suanen,

¹⁵janah menghasilken laè anggur sipesennangken. Bang minak zaitun simemaingken lumindak abèna, dekket pangaen simemerèken bana gegoh.

¹⁶Merolih udan darèdè ngo batang kayu JAHOWA kayu sempènur Libanon sinisuanNa sendiri.

¹⁷I sidi merasar mo manuk-manuk, manuk-manuk renggisa merasar i pucukna.

¹⁸Delleng-delleng ndates gabè bekkas rigarung; pelanduk ciboni i batu mamak.

¹⁹Ibakin kono ngo bulan mahan meniti ari, ibettoh mataniari katikana sundut.

²⁰Mula ipesusur Kono gellap, gabè berngin ma, janah karina binatang rambah mercèkor.

²¹Singa-singa bajar merngaor menulusi panganenna, mengido pangaan sinipehantar Dèbata.

²²Mula mbincar mataniari, menisi mo kalak i janah gempang i bekkas perciboninna.

²³Nai sampur mo jelma lako memahan bahanenna, janah terrus mengula soh bon ari.

²⁴Mermatcam bagèna i pemakinMu, alè JAHOWA, karinana ihanaken kono merkitè bijak; dom tinempamu karina tanoh èn.

²⁵Idah mo laut sikimbang i, dekket natèk-natèk mbelgah bak kèdèk oda terbilang.

²⁶I sidi keppel-keppel merlayar, dekket buaya, naga laut sinitempaMu, kumiali.

²⁷Karina kalak i mengharapken Kono, asa terolih pangaan tupung katikana.

²⁸Kono memerèken, janah kalak i pepulungkensa, Kono pehantarkensa, janah kalak i kipangan soh pulak.

²⁹Mula itondali kono, buradan mo kalak i; mula ibuat kono kessahna, mago mo kalak i, janah balik gabè abu bagè sienggona.

³⁰Tapi mula iberrè ko bai kalak i kessah, hana mo kalak i; iberrè Kono nggelluh rimbaru mi tanoh èn.

³¹Katerra pè dak hot mo kinimahangga JAHOWA sidekkah-dekkahna! Katerra pè lolo mo Ia meradepken karina sinitempaNa!

³²Itatap tanoh èn janah memaingsa menggirgir, delleng-delleng idegges, nai karuar mo cèmberNa.

³³Naing merendè aku bai JAHOWA sidekkah nggelluhku, mengendèken endè pemojiin bai Dèbatangku sidekkah lot aku.

³⁴Katerra pè lemmo mo atèna meradepken endèngku baNa, kumerna Ia ngo memakin lolo ukurku.

³⁵Belli mo jelma perdosa salpun i babo tanoh èn nai, belli mo binasa kalak perjahat salpun. Poji mo JAHOWA, alè tendingku! Poji mo JAHOWA!