Read Batak Dairi Psalm 105 Bible Online

Psalm 105 - Batak Dairi bible

Psalm 105

¹Mendokken lias atè mo kè bai JAHOWA, berritaken mo kebel- gahenNa, sukutken mo pemakinNa bai bangsa-bangsa.

²Endèken mo endè pemojiin bai JAHOWA, beritaken mo kariNa pemakinna simahantu i.

³Pellin sada Ia ngo JAHOWA; mersampang atè mo kumerna milikNa ngo kita, karina simenembahsa naing mo mersampang atè.

⁴Pido mo gegoh baNa nai, Ia mo dakdak sembah.

⁵Alè pinempar si Abraham, naposoNa i, dekket pinempar si Jakob, kalak sinipilihNa i, dak èngèt mo karina kelengangen sinibakinNa, ulang lupa ken karina keputusenNa.

⁷JAHOWA ngo Dèbatanta, merlakku ngo mi suberri tanoh èn keputusenNa.

⁸Dak ngo ièngèt ia bagah-bagahNa, merdalan ngo padanNa soh mi sidekkah-dekkahna.

⁹Padan i ibahan dekket si Abraham, janah kessa i dekket si Isak;

¹⁰nai ipetegguh nola dekket si Jakob, gabè padan simenettap bai bangsa Israel.

¹¹Nina ngo, “BerènkenKu mo tanoh Kanaan bamu, gabè harta pusakkamu.”

¹²Arnia bagè kalak sidèban ngo nggelluh bangsa Dèbata i sidi bilangen kalak i pè cituk sambing ngo.

¹³Dak mompat-ompat ngo kalak i i bangsa nai mi bangsa, mbungkas i sada nagerri nai mi nagerri sidèban.

¹⁴Tapi oda ngo iduè JAHOWA barang isè pè menèndes kalak i; kumernaken kalak i, ipesèngèt ngo raja-raja,

¹⁵“Ulang kekadè kè kalak sinipilihKu, ulang bakin jahat taba nabi-nabingKu!”

¹⁶Ipemasa JAHOWA ngo kelèhèen i nagerri i, janah ibuat karina pangaen taha-taha.

¹⁷Tapi ipasulak ngo sada kalak mengelebbèi kalak i, si Jusuf, sienggo idèa mahan hamba.

¹⁸Irakut nèhèna merkitè langgu, kerahongna merborgotken rantè bessi.

¹⁹Dungna masa mo sinialamatkenna, ipertuhu-tuhu i kata JAHOWA ngo ia.

²⁰Nai raja Mesir, simengerajai bangsa-bangsa, paluahkensa i kurungen nai.

²¹Iberèken ulaen bana mengurus istana, janah iberrèken kuasa i karina hartana;

²²bang kuasa lako mengatur pugabè raja, dekket menguluken pengetua-pengetuai.

²³Nai laus mo si Jakob mi Mesir janah merian i sidi bagè kalak siroh.

²⁴Ibakin JAHOWA mo bangsaNa merrak-merrik, gabè gegohen mo kalak i daripada alona.

²⁵Iobah mo perukuren kalak Mesir gabè merceggo atè bai bangsaNa janah memaing taba naposo-naposoNa siso puna-puna.

²⁶Nai ipasulak mo si Musa naposoNa dekket si Aron kalak sinipilihNa.

²⁷Ipepada kalak i mo i Mesir kelengangen-kelengangen, pemaing mahantu bai JAHOWA nai,

²⁸janah tunduk ngo kalak i mi perèntahNa. Nai gellap bulita mo nagerri idi ibakin JAHOWA.

²⁹Laè kalak i pè iobah gabè daroh, gabè ripas karina ikanna.

³⁰Lahlah mo tekkuk i nagerri kalak i, janah mbengket mi istana raja.

³¹Merkitè perèntah Dèbata merrohen mo naleng-naleng, dekket namuk-namuk merjibun i suberri nagerri.

³²Itunahken mo baho gancih udan, dekket maing roh perkas mencaliti.

³³Ipengerumpakken ngo kayu anggur dekket kayu ara, janah mengerumpakken karina kayu kalak i.

³⁴Merkitè perèntahNa, merrohen mo balang, mbuè kalohon, oda terbilang.

³⁵Ipangani mo karina suan-suanen sinijuma, janah kipangani kerri hasil suan-suaen.

³⁶Nai ibunuh mo nasa anak daholi buka baju i gennep jabu kalak Mesir.

³⁷Kessa i itaruhken mo bangsa Israel mbungkas, merembahi emmas ngo kalak i bak pirak; karina merkinijuah janah mergegoh.

³⁸Sempa mo ukur mbiar bak bejogiten bai kalak Mesir, nai sennang mo iakap kalak i tikan laus kalak Israel.

³⁹Ipekimbang JAHOWA mo hembun lako mengelenggemmi bangsaNa, dekket api mahan penendang tikan berngin.

⁴⁰Mengido mo kalak i, nai ibaing mo roh lèto, iberrèken ngo bai kalak i roti i sorga nai merotcè-otcè.

⁴¹Ibellah ngo delleng batu, nai mènter mercikal-cikal mo laè marir bagè batang laè i padang gurun.

⁴²Kumara ièngèt JAHOWA ngo jandiNa bai si Abraham, naposoNa.

⁴³Nai iarak mo bangsa i merdengan lolo atè, kalak sinipilihNa merdengan surak-surak.

⁴⁴Tanoh bangsa-bangsa iberèken bai kalak i, tahuma kalak i ibakin gabè milik bangsaNa,

⁴⁵asa tunduk bangsaNa idi mi pati-patinNa janah perèntah-perèntahNa. Poji mo JAHOWA!