Read Batak Dairi Psalm 106 Bible Online

Psalm 106 - Batak Dairi bible

Psalm 106

¹Poji mo JAHOWA! Mendok lias atè mo bai JAHOWA, kerna permendè basa ngo Ia; menettap ngo masèh atèNa.

²Isè ndorok menoriken kegegohen JAHOWA, dekket memerrè pemojiin patut baNa?

³Sayurntua ngo kalak simenguèi perèntah-perèntahNa, janah dak bennar perulanna.

⁴Dak èngèt mo aku alè JAHOWA, kumara mendè basaMu bai bangsaMu, dak urupi ma mo aku mula ipaluah Kono kalak i.

⁵Katerra pè kuidah mo kiniduma kalak sinipilihMu janah mersampang atè rebbak dekket bangsaMu. Katerra pè gegah mo aku janah merlolo atè rebbak dekket kalak sienggo gabè milikMu.

⁶Enggo merdosa kami bagè empung nami; enggo kuulaken kami jahat janah durhaka.

⁷Tikan i Mesir oda ngo mèut empung nami; oda iarti kalak i penghanakenMu mahantu i. Lupa kalak i i masèh atèMu siso tersipat, janah i gembar Laut Arngo berontak kalak i taba Sintèmbul kalohon i.

⁸Tapi ipaluah JAHOWA ngo kalak i kemulihken diriNa sendiri, asa gabè ntarar kegegohenNa.

⁹Merkitè perèntahNa gabè ngkerrah ngo Laut Arngo, ibabai mo bangsaNa merdalan memellus laut, bagè mengelausi padang gurun.

¹⁰Merkitè bagidi mo kalak i ipaluah i tangan alona nai, ipaluah kalak i ibas kuasa musuh nai.

¹¹Tapi ilennengken laè mo alo kalak i; sada kalak poda lot tading.

¹²Nai tok mo ukur bangsaNa mi bagah-bagahNa janah mengendèken pemojiin baNa.

¹³Tapi mènter lupa ngo kalak i pemakin JAHOWA janah memahan bahan oda pella merpengkuso mendahisa.

¹⁴Irajai cubellekna mo kalak i i padang gurun ninganna mengoji Dèbata.

¹⁵Iberrèken ngo kadè sinipido kalak i, tapi dekket sakit wabba sempa taba kalak i.

¹⁶Ncian ngo ukur kalak i midah si Musa i padang gurun dekket bai si Aron naposoNa simbadia.

¹⁷Nai ntaka mo tanoh i memendut si Datan, menungkupi si Abiram dekket simpangansa.

¹⁸Susur mo api mencalit pulungen kalak i, mengelekkup karina sienggo gabè durhaka.

¹⁹Ibahan kalak i ngo anak lembu emmas i Delleng Sinai, janah menembah gana-gana tuangen idi.

²⁰Igancih kalak i ngo Dèbata simetunggung i dekket gana-gana lembu sikipangan dukut.

²¹Lupa ngo kalak i bai Dèbata sipaluahken kalak i sienggo mahanken kelengangen i Mesir.

²²Tuhu-tuhu mahantu kalohon ngo pemakinNa i nagerri i, pebengapken ngo sinibakinNa i Laut Arngo.

²³Nai mertaki mo Dèbata lako mengeripasken bangsaNa, tapi isondati si Musa, kalak sinipilihNa. Si Musa ngo gabè menampati kalak i, nai gabè malum mo laga Dèbata.

²⁴Kessa i nola itulak kalak i mo nagerri simerandal idi kumara oda tok mi bagah-bagah Dèbata.

²⁵Ngut-nguten mo kalak i i undung-undung kalak i janah oda uè mendengkohken sora JAHOWA.

²⁶Nai isumpahken mo lako memunuh kalak i i padang gurun.

²⁷Pinempar kalak i ibuang mi tengah bangsa-bangsa janah ipemèrap i nagerri-nagerri sidèban.

²⁸Nai isembah kalak i mo dèbata Baal i Peor, janah kipangan pèlèen sinipèlèken bai dèbata siso tuhu.

²⁹Pengelako sibagidi ngo mendungkul laga JAHOWA, nai gabè sempa mo bai kalak i sakit wabba ntengam.

³⁰Tapi kèkè mo si Pinehas menghukum simersalah, nai mentadi mo sakit wabba i.

³¹Iètong ngo pemaingna i jasana, janah ièngèt soh mi sidekkah-dekkahna.

³²Melaga ngo JAHOWA ibakin kalaki i telaga-telaga Meriba, janah menusahi si Musa kemulihken ulah-ulah kalak i.

³³Kessal ngo ukurna ibakin kalak i, gabè idokken mo ranana oda pella sanga ipikiri.

³⁴Oda isalpuni kalak i bangsa-bangsa sidèban, bagè siniperèntahken JAHOWA.

³⁵Balikna mersada ngo kalak i dekket bangsa-bangsa idi; janah mengosih pengelako kalak i siso menandai Dèbata.

³⁶Nai isembah kalak i mo gana-ganaen, janah imo kulih sebabna maing susah kalak i.

³⁷Ipelèken kalak i ngo dukak-dukakna taba sembah-sembahen kalak Kanaan.

³⁸Iorèken kalak i ngo daroh siso mersalah, daroh dukak-dukak kalak i sendiri; lako pèlèenken bai gana-ganaen i; gabè mekemmer mo nagerri i ibakin kalak i.

³⁹Kumernaken ulah-ulah bagidi gabè melamun mo kalak i, janah oda setia taba Dèbata.

⁴⁰Nai seggat mo laga JAHOWA taba kalak i, moyang atèNa midah milikna sendiri.

⁴¹Nai isohken mo kalak i bai bangsa-bangsa, ibelli mo kalak i irajai musuh.

⁴²Nai idersa musuh-musuhna mo kalak i, janah ipetunduk mi terruh kuasa kalak i.

⁴³Nggati ngo ipaluah JAHOWA kalak i, tapi doliin ngo iakap kalak i memberontak, dungna binasa mo kalak i ipas dosa-dosana.

⁴⁴Tapi idengkoh ken JAHOWA ngo derko-derko kalak i, idatèken ngo kesusahen kalak i.

⁴⁵Mengkepkep kalak i ièngèt ngo bagah-bagahNa janah mengkekelengi kalak i kumarna masèh atèNa mbelgah i.

⁴⁶Ibakin ngo kalak i terolih masèh atè karina kalak simenaban kalak i.

⁴⁷Dak paluah mo kami, alè JAHOWA Dèbata nami, pepulung mo kami balik i tengah-tengah bangsa-bangsa nai, asa terbaing kami mendokken lias atè janah memoji gerarMu simbadia.

⁴⁸Poji mo JAHOWA, Dèbata Israel, bagèndari dekket soh mi sidekkah-dekkahna. Dak bakin mo karina kalak mendokken, “Amèn!” Poji mo JAHOWA!