Read Batak Dairi Psalm 107 Bible Online

Psalm 107 - Batak Dairi bible

Psalm 107

¹“Mendokken lias atè mo kènè ta- ba JAHOWA kerna permendè basa ngo Ia, soh mi sidekkahNa ngo hot masèh atèna.”

²Dakdak mo ranaken kènè idi, kènè alè sienggo ipaluah i kepersuken nai.

³Enggo ipedèmpu kènè i nagerri-nagerri sidèban nai, i kebincaren dekket kesunduten, utara bak selatan.

⁴Lot ngo kadap i rambah lunglang, janah oda ibettoh nè dalan mi bekkas merian i kuta.

⁵Kelèhèen ngo kalak i janah muasen janah mago karina harapen.

⁶Ibagasen kesusahen dilo-dilo ngo kalak i bai JAHOWA, janah ipaluah ngo kalak i ipas kepenjetten nai.

⁷Itatang-tatang ngo kalak i tarap dalan mpènter mi bekkas merian i kuta.

⁸Patut ngo kalak i mendokken lias atè bai JAHOWA kumara masèh atèNa, kumara karina pemakinna metunggung i bai jelma.

⁹Kumara ipepolih ngo muas kalak simuasen, dekket mertinèncukken bai kalak sikelèhèen merbagè-bagè simerandal.

¹⁰Lot ngo deba mbengkuk ibas kegellapen, kalak sikurungen menggong sindersa ipas langgu bessi,

¹¹kumarna enggo memberontak kalak i taba Dèbata janah oda isuihken perèntah Pergegoh Sisotercodi.

¹²Irennuk ngo kalak i merkitè ulaen mberrat; geppah kalak i janah oda lot meneggu.

¹³Ibagasen kesusahen dilo-dilo ngo kalak i bai JAHOWA, janah ipaluah ngo kalak i ipas kepenjetten nai.

¹⁴Ibabai ngo kalak i karuar i kegellapen nai, janah mengerettes langgu kalak i.

¹⁵Patut ngo kalak i mendokken lias atè bai JAHOWA kumarna masèh atèNa, kumara karina pemakinna simahantu i bai jelma.

¹⁶Kumarna irumpakken ngo pèntu-pèntu tembaga, janah menggeppui gerruk-gerruk bessi.

¹⁷Lot ngo gabè moto janah mpersuk kumernaken dosa-dosa kalak i, janah idersa kumerna kesalahen kalak i.

¹⁸Moyang atè kalak i midah karina pangaen, enggo njolmit ajal kalak i.

¹⁹Tikan kesusahen dilo-dilo ngo kalak i taba JAHOWA, janah ipaluah ngo kalak i ipas kepenjetten nai.

²⁰Ipejuah ngo kalak i merkitè perèntahNa, janah mengkelini kalak i i pendèban nai.

²¹Patut ngo kalak i mendokken lias atè bai JAHOWA kumerna masèh atèNa, kumerna karina pemakinNa simahantu i bai jelma.

²²Belli mo kalak i pesakatken lias atè merkitè merembah pèlèen, janah menukutken pemakinna merkitè endè-endè lolo atè.

²³Lot ma ngo simemellus laut dekket keppel, lako menulusi nggelluh i laut mbellang.

²⁴Idah kalak i ngo pemakin JAHOWA, kelengangen sinibakinNa i tengah laut.

²⁵Merkitè perèntahNa ngo menempul angin topan dekket menggoncangken galombang.

²⁶Keppel-keppel terpekèkè ndates mi babo, nai itulpasken mi dangaen laut i. Mago mo keberanien jelma mengadeppi mara simbelgah i.

²⁷Mengget mo iakap kalak i janah jumemba-jemba bagè kalak mabuk dekket bagè bennè pikiren.

²⁸Ibas kesusahen dilo-dilo ngo kalak i taba JAHOWA, janah ipaluah ngo kalak i ibas kepenjetten nai.

²⁹Angin sapa-sipu iperèntahken ndong, galombang-galombang pè gabè mènak.

³⁰Lolo mo kalak i kumerna enggo laus angin kalisungsung; iembah mo kalak i mi labuhen sinituju.

³¹Patut ngo kalak i mendokken lias atè bai JAHOWA kumarna masèh atèNa, dekket kumarna karina pemakinna metunggung i bai jelma.

³²Termurmur ngo ibaing kalak i ketunggungen JAHOWA i tengah-tengah bangsaNa, janah memojisa i pulungen situa-tua.

³³Iobah ngo batang laè gabè padang gurun takal laè gabè tanoh dakkir.

³⁴Tanoh nggabur ibakin gabè tanoh masin, kumara kejahaten jelma simengianisa.

³⁵Padang gurun iobah gabè bendar, tanoh ngkerrah gabè takal laè.

³⁶Ibakin ngo kalak simelèhè mi sidi; ipajek kalak i mo kuta mahan bekkas kalak i.

³⁷Iardangi kalak i mo tahuma janah menuani anggur, nai ipepulung hasilna mertinèncuk.

³⁸Ipasu-pasuken JAHOWA ngo bai kalak i mbuè dukak, janah merrak-merrik pukpuk pinakan kalak i.

³⁹Tapi italuken ngo kalak i janah cituk nai ngo tading kumara kinidersa dekket penèndes kejam.

⁴⁰Ipesusur JAHOWA ngo pengulu-pengulu kalak i, janah pasulakken kalak i kadap i rambah lunglang siso lot lapangna.

⁴¹Tapi ukum kalak sincor ipaluah ngo i kesusahen kalak idi nai, meppar ngo kalak i bagè pulungen biri-biri.

⁴²Kalak bujur mengidahsa janah merlolo atè, tapi ikontam ngo babah kalak perjahat.

⁴³Katerra pè dak iradum-radumi kalak simpantas-niasè mo karina idi janah mengakuken tong ngo mermasèh atè JAHOWA.