Read Batak Dairi Psalm 108 Bible Online

Psalm 108 - Batak Dairi bible

Psalm 108

¹Endè. Psalm si Daud.

²Tok kalohon ngo aku, alè Dèbata, naing ngo aku mengendèken janah memoji Kono.

³Kèkè mo kono, alè tendingku! Kèkè mo ko, genderrang bak kucapi! Naing kudungkuli ngo langat.

⁴Alè JAHOWA, naing ngo dok atèngku mendokken lias atè baMu i tengah-tengah bangsa-bangsa. Sekel aku mengendèken pemojien baMu i tengah ummat manusia

⁵Kumara mbelgah ngo masèh atèMu soh mi langit janah mendè basaMu soh mi hembun-hembun.

⁶Alè Dèbata, tuduhken mo ketunggungenMu i langit, dekket kemuliaenMu i suberri tanoh èn.

⁷Perkinijuahi mo kami merkitè kuasaMu, aloi mo sodip nami, asa ipaluah jelma sinikekelengimu.

⁸Mongkam ngo Dèbata i bekkasNa simbadia i nai, “Naing mersurak ngo aku janah memella-mellaken tanoh Sikhem, menendungken Napa Sukot.

⁹Aku ngo sidasa Gilead dekket Manasye, Efraim tangkuluk wajangKu, janah Judea tongket kerajaenKu.

¹⁰Tapi ukum Moab imo bekkas pemorihen nèhèngKu; mersurak kemenangen ngo Aku meraloken Pilistea. Kukebekken ngo cipatungKu dempak Edom, petandaken milikKu ia.”

¹¹Isè merembah aku mi Edom? Isè mo mabai aku mi kuta merbèntèng i?

¹²Alè Dèbata, oda ngo dekket ko rasken kami? Oda ngo kebbas Kono rasken soridadu nami?

¹³Dak urupi mo kami meraloken musuh, kumara magosia ngo pengurupien jelma.

¹⁴Merdenganken Dèbata, mergegoh kalohon ngo kita; ia ngo menaluken musuhta.