Read Batak Dairi Psalm 109 Bible Online

Psalm 109 - Batak Dairi bible

Psalm 109

¹Bai simenguluken perendè. Psalm si Daud. Alè Dèbata si dak tong kupoji, ulang mo kono nono.

²Kumara ijuhap perjahat dekket penipu ngo aku siperaratken rana-rana luap tersèngèt diringku.

³Irubati kalak i ngo aku merkitè rana-rana dom ceggo atè, janah menjuhap aku oda lot sebbabna.

⁴Itukasi kalak i ngo aku, kasi pè kukekelengi kalak i, janah enggo menodipken kalak i.

⁵Ibalesken kalak i ngo simerandal kubaing dekket kejahaten, janah nggogo ibalesken mi kelleng atèngku.

⁶Pebangkit mo sada kalak perjahat lako menghukumsa, bakin mo ia iaduken alona.

⁷Belli mo ia irungguken janah ituhui mersalah, janah baing mo sodipna iètong gabè dosa.

⁸Baing mo ndor merpunca nggelluhna, dekket ulaenna ibuat kalak sidèban.

⁹Baing mo dukak-dukakna melumang, janah sinibagesna gabè mbalu.

¹⁰Baing mo dukak-dukakna gabè pengido-ngido mengkadapi, janah ipellaus i sapona terulang nai.

¹¹Baing mo karina ugasenna isita perutangenna, janah irampas dèba hasil ndiulana.

¹²Ulang mo lot kalak mermasèh atè tabasa, barang mengkekelengi dukak-dukak sinitadingkenna.

¹³Belli mo ibinasaken karina pinemparna, janah gerarna ilupaken cundut i podina.

¹⁴Belli mo dak ièngèt JAHOWA kejahaten empungna, janah oda isasa dosa inangna.

¹⁵Belli mo dak ièngèt JAHOWA dosana, janah isè nè poda mernèngèt kalak i i tanoh èn.

¹⁶Kumara oda nung ièngèt kalak i lako mahanken masèh atè. Ipedersa-dersa ngo kalak sincor dekket simpersuk, janah memunuh kalak siso mergoldè.

¹⁷Kucul ngo ia menumpahi; baing mo ia nola kenna sumpah! Oda uè ia merrèken pasu-pasu, ulang mo lot pasu-pasu bana!

¹⁸Biasa ngo ulaen menumpahi i bana, dos bagè menelluk pakèen. Bakin mo sumpah idi mendersep bagè laè mi dagingna, janah bagè minak mi bagasen tulan-tulanna.

¹⁹Belli mo sumpah idi memalutisa bagè pakèen, janah dak tong mengelilitisa bagè tali abak.

²⁰Alè JAHOWA, dabuh mo hukumen idi taba simenukasi aku, taba kalak simendokken aku jahat.

²¹Tapi urupi mo aku rembang mi bagah-bagahMu, alè JAHOWA Dèbatangku, perkinijuahi mo aku kumara mendè basamu dekket masèh atèMu.

²²Kumara ncor ngo aku janah mpersah, janah bagè sinirusuk atè-atèngku mbages kaloen.

²³Naing-naing mersep ngo aku bagè lèndung tikan bon ari, ipastakken ngo aku bagè balang.

²⁴Menggirgir ngo tèunku kumerna puasa, dagingku gabè mèrung bage kias-kias.

²⁵Kalak simenengen aku mengeleai aku ninganna mengupir-ngupirken takal.

²⁶Urupi mo aku, alè JAHOWA Dèbatangku, paluah mo aku rembang mi masèh atèMu.

²⁷Nai bettohen musuhku mo kono ngo memaing bagidi, magahken Kono, JAHOWA ngo, simenghanaken idi.

²⁸Tukasi pè kalak idi menumpahi aku, katerra pè pasu-pasu mo aku. Agia nola pè kalak i kèkè, kennah termèla mo kalak i; tapi dak ipesampang mo ukurku naposomèn.

²⁹Belli mo kalak i simenukasi aku idomi kinilèa, janah kememèla memaluti kalak i bagè jubah.

³⁰Naing kupoji ngo JAHOWA merkitè sora nggang, pesarkensa i tengah-tengah pulungen bangsa.

³¹Kumerna ipebèlai janah ipaluahi ngo kalak sincor bai kalak i nai simendabuh hukumen matè tabasa.