Read Batak Dairi Psalm 115 Bible Online

Psalm 115 - Batak Dairi bible

Psalm 115

¹Oda ngo kami, oda kami, alè JAHOWA, tapi kennah Kono sambing ngo mahan sipojien, kumara dak bujur ngo Kono janah dak tong mermasèh atè.

²Kasa mo pella karina bangsa kennah mendokken, “Idikè ngo Dèbata kalak i?”

³I sorga ngo merian Dèbatanta, ipetupa Ia ngo kadè sambing dok atèNa.

⁴Emmas ngo sembahen kalak i bak pirak, sinitukkangen tangan jelma.

⁵Lot ngo babah kalak i, tapi mak ndorok mengerana, lot ngo matana, tapi mak ndorok merpendidah.

⁶Lot ngo coping kalak i, tapi mak ndorok merpendengkoh, lot ngo ègungna, tapi mak ndorok merpenganggoh.

⁷Lot ngo tangan kalak i, tapi mak ndorok menjamah, mernènèh, tapi mak ndorok merdalan, janah oda lot sora huap ibas bergengna nai.

⁸Katerra pè bagi mo nasip kalak simemahansa, dekket karina kalak simerketoken bana.

⁹Alè Israel, merkeposen bai JAHOWA mo, ia ngo mengurupi janah mengkelungkumi kènè.

¹⁰Alè kènè imam, dak merkeposen bai JAHOWA mo kènè, Ia ngo mengurupi janah mengkelungkumi kènè.

¹¹Alè kènè karina simerpenguèi, merkeposen bai JAHOWA mo kènè, Ia ngo mengurupi janah mengkelungkumi kènè.

¹²Dak èngèten JAHOWA ngo kita janah dak ipasu-pasu, dak pasu-pasuenna ngo bangsa Israel dekket karina imam pemparen si Aron.

¹³Dak ipasu-pasu ngo karina kalak simerpenguèi, agia kèdèk barang pè mbelgah.

¹⁴Katerra pè dak ibasa-basaken JAHOWA mo anak mbuè, taba kènè dekket pinempar ndènè.

¹⁵Katerra pè dak ipasu-pasu JAHOWA mo kènè, simenempa langit dekket tanoh!

¹⁶Pellin JAHOWA sambing ngo sidasa langit, tapi ukum tanoh èn iberrèkenNa ngo bai jelma.

¹⁷Oda nè ngo ipoji kalak sienggo matè JAHOWA, kalak sienggo susur mi bekkas simelongo.

¹⁸Tapi ukum kita singgelluh mendokken lias atè baNa, bagèndari dekket soh mi sidekkah-dekkahna. Poji mo JAHOWA!