Read Batak Dairi Psalm 118 Bible Online

Psalm 118 - Batak Dairi bible

Psalm 118

¹Mendok lias atè mo kènè bai JAHOWA kumara permendè basa ngo Ia menettap soh mi sidekkahna ngo kelleng atèNa.

²Naing mo nemmuken kalak Israel mendokken, “Menettap soh mi sidekkahna ngo Kelleng atèna.”

³Naing mo nemmuken imam-imam mendokken, “Menettap soh mi sidekkahna ngo Kelleng atèna.”

⁴Naing mo nemmuken karina kalak simerpenguèi mendokken, “Menettap soh mi sidekkahna ngo Kelleng atèna.”

⁵Ibas kepenjettenku dilo-dilo ngo aku bai JAHOWA; nai ialoi janah ipaluah mo aku.

⁶Oda ngo aku buradan kumara JAHOWA ngo mendengani aku, oda mergoldè jelma tabaku.

⁷Idengani JAHOWA ngo aku mahan urupenna, kuidah mo musuhku italuken.

⁸Sellohen ngo culendung bai JAHOWA, daripada mengasangken jelma.

⁹Sellohen ngo culendung bai JAHOWA, daripada mengharapken kalak sibèak.

¹⁰Meduk ngo musuh mencingkoi aku; merkitè kuasa JAHOWA, kutaluken ngo kalak i.

¹¹Ijuhap kalak i ngo aku i karina bekkas nai; merkitè kuasa JAHOWA, kutaluken ngo kalak i.

¹²Bagè wani ngo kalak i memuluti aku; merkitè kuasa JAHOWA, kutaluken ngo kalak i. Ibas singkerdep mata ngo kalak i ièntepken bagè api mengelekkup rambah merdori.

¹³Ijuhap ngo aku mertuhu-tuhu janah sanga naing geppah, tapi iurupi JAHOWA ngo aku.

¹⁴JAHOWA ngo kegegohenku bak sipojienku, enggo ipaluah aku.

¹⁵Dengkohken mo surak kemenangen i undung-undung bangsaNa, “Ibaing JAHOWA ngo perbuaten mahantu!

¹⁶Kuasa JAHOWA ngo memerèken banta kemenangen! Ibaing JAHOWA ngo perbuaten mahantu.”

¹⁷Oda nè matè aku, tapi dak tong nggelluh lako memeritaken pemaing JAHOWA.

¹⁸Enggo isiksa JAHOWA aku mpiah, tapi oda iberrè aku mi kematèen.

¹⁹Buka mo pèntu pengkeruhen Bages JAHOWA baku, asa mbengket janah mendokken lias atè aku baNa.

²⁰En ngo pèntu pengkeruhen JAHOWA, pellin kalak bujur ngo kessa ndorok memellussa.

²¹Kupoji mo Ko, kumara iuèi Kono sodipku; Enggo iberèken kono kemenangen baku.

²²Batu sinipitakken kalak sipandè mertukkang, enggo gabè batu cendi.

²³Idi mo pemaing JAHOWA, tuhu-tuhu memaing bengngap ukurta.

²⁴Enda ngo ari sinitentuken JAHOWA; roh mo kènè sipèstaken merdengan lolo atè.

²⁵Kupido kami, alè JAHOWA, dak paluah mo kami, alè JAHOWA, berrè mo bai nami kemenangen!

²⁶Ipasu-pasu mo ia siroh merkitè-kitè gerar JAHOWA, kupasu-pasu kami mo ko i Bages JAHOWA nai.

²⁷JAHOWA ngo Dèbata, masèh ngo atèna banta. Berkat mo merotor dekket ranting i tanganna, janah kulilingi mo langgaten JAHOWA.

²⁸Kono ngo Dèbatangku, lias atè mo baMu, alè Dèbatangku, dak kupehangga ngo Ko.

²⁹Mendok lias atè mo kènè bai JAHOWA kerna permendè basa ngo Ia, soh mi sidekkahna ngo masèh atèNa.