Read Batak Dairi Psalm 119 Bible Online

Psalm 119 - Batak Dairi bible

Psalm 119

¹Sayurntua ngo kalak siso mertikas nggelluhna janah menguèi pati-patien JAHOWA.

²Sayurntua ngo kalak simengèkutken perèntahNa, janah ibas nasa ukurna nai mengusahaken menandai JAHOWA.

³Sayurntua ngo kalak simerpengelako mengèkutken lemmo atè JAHOWA, janah oda mengulaken kejahaten.

⁴Iberèken kono bai nami pati-patinMu alè JAHOWA, asa tuhu-tuhu kuulaken kami dekket setia.

⁵Katerra pè ntegguh mo ukurku mengulaken hatoren-hatorenMu.

⁶Mula kudatèken karina perèntahMu, oda ngo termèla aku.

⁷Mula kuguruken keputusenMu sintèger i, pojienku ngo Ko ibas nasa ukurku mbersih nai.

⁸Naing kuuèi ngo patinMu, dak ulang mo tadingken aku.

⁹Simatah daging ndorok menjaga nggelluhna ulang mertikas mula nggelluhna mengèkuti perèntahMu.

¹⁰Ipas nasa ukurku nai kuusahaken ngo lako menandai Kono, ulang duè aku menurimpang i perèntahMu nai.

¹¹Kupennep ngo ajarMu ibas ukurku, asa ulang merdosa aku taba kono.

¹²Kupoji ngo kono, alè JAHOWA, ajarken mo baku dalanMu.

¹³Nggang ngo kutingtingken karina patien siniberèkenmu.

¹⁴Lolo ngo aku mengèkutken perèntah-perèntahMu, bagè merolihken mermatcam bagè harta.

¹⁵Naing kuguruken ngo keputusen-keputusenMu, janah mendatèken sinipeddahkenMu.

¹⁶HatorenMu ngo memaingken aku sennang; oda kulupaken peddahMu.

¹⁷Katerra pè mermasèh atè mo Ko taba naposoMu ènda, asa dak tong aku nggelluh janah menguèi peddahMu.

¹⁸Pebidak mo matangku asa ndorok menengen aku ajar sikelengangenken ibas patinMu.

¹⁹Pellin sinempas ngo kessa aku merian i dunia, ulang boniken patinMu bangku nai.

²⁰Mpiah kuakap kerna ntedohku, sèkel aku gennep tèk memettoh patinMu.

²¹Ipincang kono ngo kalak sindates merukur, janah isumpahi kono ngo kalak simenurimpang i perèntahMu nai.

²²Pesisi mo aku ipas pengelèai bak pengerèhè kalak i nai, kumerna kuulaken hatorenMu ngo.

²³Tukasi pè penguasa-penguasa mertumpu mengalo aku, dak tong ngo ièngèt naposoMu ènda sienggo nidokkenMu.

²⁴Hatoren hatorenMu ngo gabè menettoi aku sipesennangken ukurku.

²⁵Gampar ngo aku ipas abu; ulakken mo nggelluhku rembang mi bagah-bagahMu.

²⁶Kuaku ngo pemahanku; nai ialoi Kono mo aku; ajarken mo baku dalanMu.

²⁷Urupi mo aku mengarusi pati-patinMu, dak kupekoser-koser ngo peddahmu maharga i.

²⁸Melala ngo atè-atèngku idendenni kesusahen, pergegohi mo aku rembang mi bagah-bagahMu.

²⁹Pedaoh mo aku i dalan kelalingen nai, kumerna mendè basaMu, ajarken mo baku patinMu.

³⁰Enggo kupilih asa merpenguèi, dak kuèngèt-èngèt ngo perèntahMu.

³¹Enggo kuèkutken hatoren-hatorenMu, alè JAHOWA, ulang duè aku termèla.

³²Sennang ngo ukurku menguèi perèntahMu, kumara ibakin Kono ngo aku muat merpengantusi.

³³Alè JAHOWA, ajarken baku lapaten karina dalanmu, asa kuèkutken soh mi puncana.

³⁴Baing mo aku mengantusi tersèngèt patinMu asa kuuèi, janah kuulaken ibas nasa ukurku.

³⁵Katerra pè dak hot mo aku mencèkèp kadè sinidokkenMu, kumerna i ngo lemmo atèngku.

³⁶Berrè mo baku harkat lako menguèi hatorenMu, lampo daripada sèkel lako kaya.

³⁷Jamotken mo aku asa ulang mengayaki simagosia, baing mo aku nggelluh rembang bagè sinipergeddoMu.

³⁸Petettah mo padanMu bai naposoMu ènda, siniberrèkenmu bai kalak simerpenguèi baMu.

³⁹Pedaoh mo pengelèan sikukebiari, kumarna sondel ngo mendèna patinMu.

⁴⁰Berrèken mo baku nggelluh sirimbaru, kumerna nteger ngo kono, merharkat ngo aku lako menguèi keputusen-keputusenMu.

⁴¹Alè JAHOWA, tuduhken mo magahken bagi kellengna atèmu baku, perkinijuahi mo aku rembang bagè siniperbagahMu.

⁴²Nai ndorok mo aku mengaloi kalak simengelèai aku, kumerna kataMu ngo sikuasangken.

⁴³Urupi mo aku asa dak tong mengeranaken situhuna, kumerna mengharap taba sinidokkenMu ngo aku.

⁴⁴Dak naing ngo aku ciranggun mi patinMu, soh mi sidekkah-dekkahna.

⁴⁵Nai bebas mo aku ibas nggelluhku, kumara dak kuusahaken ngo lako menguèi peddahMu.

⁴⁶Dak kusukutken ngo hatorenMu bai raja-raja, janah oda termèla aku.

⁴⁷Lemmo atèngku imo mengulaken sinidokkenMu, kumara ngkelleng atèngku bana.

⁴⁸Kupesangap janah kukekelengi ngo perèntahMu, kuradumi ngo nasa dalanMu.

⁴⁹Dak èngèt mo jandiMu bai naposoMu ènda, jandi simemerèken harapen baku.

⁵⁰Enda ngo mengapoi ukurku ibas sitahanenku, padanmi ngo memerèken baku kenggeluhen.

⁵¹Mengelèai kalohon ngo kalak jukkat taba aku, tapi oda menurimpang aku ibas patinMu nai.

⁵²Dak kuèngèt ngo patinMu sienggo lot kin arnia nai, nai terapo mo ukurku, alè JAHOWA.

⁵³Melaga kalohon ngo aku taba kalak perjahat, kumarna itadingken kalak i patinMu.

⁵⁴Sidekkah nggelluhku persigejapen i tanoh èn, hatorenMu ngo kubakin gabè endè-endè pemojien.

⁵⁵Sidang berngin terèngèt aku baMu, alè JAHOWA, dak kucèkèp ngo patinMu.

⁵⁶Merolih kesayurntuaen ngo aku ibas menguèi karina perèntahMu.

⁵⁷Pellin kono ngo sikuketedohken, alè JAHOWA, merpadan mo aku lako mengulaken peddahMu.

⁵⁸Ibas nasa ukurku nai ngo aku mengido masèh atèMu, masèh mo atèmu baku rembang bagè siniperbagahMu.

⁵⁹Enggo kuradum-radumi pengelakongku, janah merpadan mo aku lako menguèi perèntahMu.

⁶⁰Dak kusudu ngo janah oda sanga tendo lako mengulaken perèntahMu.

⁶¹kalak perjahat menogongi aku, tapi oda kulupaken patinMu.

⁶²Kèkè ngo aku tengah mberngin lako memoji Kono, kumara hukumMu sintèger i.

⁶³Mersupan-supan ngo aku dekket karina kalak simerpenguèi, karina kalak simengulaken perèntahMu.

⁶⁴Dom masèh atèMu ngo suberri tanoh èn, alè JAHOWA, ajarken mo baku hatoren-hatorenMu.

⁶⁵Enggo ipesaut kono padanMu, alè JAHOWA, janah memaing selloh bai naposoMu.

⁶⁶Berrè mo baku kepantasen dekket perbinettohen, kumara tok ngo ukurku taba perèntah-perèntahMu.

⁶⁷Sinderrang makdèng ihukum, menurimpang ngo aku, bagèndari ciranggun mi perèntahMu ngo aku.

⁶⁸Kumara permendè basa ngo Ko janah mahanken selloh, ajarken mo baku hatoren-hatorenMu.

⁶⁹Iselbuh kalak sijukkat merukur ngo aku, tapi ukum aku menguèi keputusenMu ibas pusuh peratènku nai.

⁷⁰Ukum kalak i oda ngo iantusi, tapi ukum baku patinMu ngo pesennangken ukurku.

⁷¹Tuhu sellohen ngo ko menghukum aku, asa kutandai hatoren-hatorenMu.

⁷²Ukum baku mahargaen ngo patinMu daripada karina emmas dekket pirak sinidunia èn.

⁷³Kono ngo menghanaken janah menempa aku, berrè mo baku pengantusien lako mengguruken perèntah-perèntahMu.

⁷⁴Sennang mo kalak simerkebiaren mula idah aku, kumara mengharap mi bagah-bagahMu ngo aku.

⁷⁵Kubettoh ntèger ngo keputusenMu alè JAHOWA, Enggo ihukum kono aku kumerna mendè basaMu.

⁷⁶Katerra pè masèh atèMu mo gabè peloloken ukurku, rembang bagè siniperbagahMu bai naposoMu.

⁷⁷Dak masèh mo atèmu baku, asa dak tong nggelluh aku, kumara patinMu ngo pesennangken ukurku.

⁷⁸Belli mo kalak jukkat gabè termèla kumara enggo ipendokken kata siso tuhu tersèngèt aku, tapi ukum aku dak tong ngo kuradumi perèntah-perèntahMu.

⁷⁹Katerra pè merrohen mo kalak simerkebiaren taba aku, karina kalak simenandai hatoren-hatorenMu.

⁸⁰Katerra pè ulang mo laling ukurku i hatorenMu nai, asa ulang termèla aku.

⁸¹Nteddoh kalohon ngo ukurku midah keluahen siroh bamu i nai; bagah-bagahMu ngo sikuharapken.

⁸²Maker matangku memèma ipesaut Kono bagah-bagahMu, ningku ngo, “Ndigan ngo iapoi kono ukurku?”

⁸³Ngkurtut koling-kolingku bagè bekkas anggur sienggo malè, tapi oda kulupaken sinidokkenMu.

⁸⁴Soh ndigan naposoMu ènda kennah sobar? Ndigan ngo ihukum kono kalak simengeletlet aku?

⁸⁵Kalak siso menguèi patinMu, enggo mengkurak geddung lako menogongi aku.

⁸⁶Karina patinMu ndorok terasangken, urupi mo aku, kumara iletlet ngo aku oda lot sebabna.

⁸⁷Enggo hampir naing dapet ibunuh kalak i aku, tapi oda mak kusuihken perèntahMu.

⁸⁸Perkinijuahi mo aku kumarna dak ngo kono mermasèh atè, asa ndorok aku menguèi patinMu.

⁸⁹Alè JAHOWA, ntegguh ngo kataMu soh mi sidekkah-dekkahna, hot menettap i sorga.

⁹⁰Mendè basaMu menettap soh segen, ipajek kono ngo tanoh èn gabè dak tong lot.

⁹¹Karina jelma silot bagèndari, lot kumerna perèntahMu, kumara karina kalak i naposoMu.

⁹²Kum oda kin patinMu benna lolo atèngku, pasti enggo matè aku ibas kinipersukku.

⁹³Soh mi sidekkahna oda kulupaken perèntahMu, kumara merkitèken idi ngo ipegelluh ko aku.

⁹⁴Paluah mo aku, kumara kono ngo sidasa aku, enggo ngo kupala-palai lako menguèi sinidokkenMu.

⁹⁵Memèma-mèma ngo kalak perjahat naing memunuh aku, tapi uè ngo aku memperatè-atèken patinMu.

⁹⁶Kuidah simerandal kalohon idi pè mertikki ngo, pellin perèntahMu ngo kessa sondel merandal.

⁹⁷Sondel kelleng atèngku midah patinMu; dak kuradum-radumi ngo terrus ari.

⁹⁸Dak kuèngèt ngo perèntahMu, memaingken aku bijaken dari pada musuh-musuhku.

⁹⁹Pengantusingku lampo i pengantusien guru-gurungku nai, kumara dak kuradum-radumi perèntah-perèntahMu.

¹⁰⁰Lebih mengarusi ngo aku daripada situa-tua, kumara kucèkèp ngo karina sinihatorkenMu.

¹⁰¹Kupesisi karina pengelako jahat, asa merpenguèi aku mi peddahMu.

¹⁰²Oda kutondali patinMu, kumara ko ngo mengajari aku.

¹⁰³Tenggi kalohon ngo pengeranaenMu, tenggien daripada tenggoli!

¹⁰⁴Pati-patinMu memerèken baku pengantusien, gabè nceggo ngo atèngku mengidah ulah-ulah kilang.

¹⁰⁵KataMu ngo suluh i perdalanenku, cuhaya lako menerangi dalanku.

¹⁰⁶Sikujandiken merkitè bulaban naing kupahèi, lako ciranggun mi keputusenMu sintèger i.

¹⁰⁷Mpersah kalohon ngo kuakap, alè JAHOWA, jamoti mo nggelluhku rembang bagè siniperbagahMu.

¹⁰⁸Jalo mo sodip lias atèngku, alè JAHOWA, janah ajarken mo baku pati-patinMu.

¹⁰⁹Dak mengaban-ngabanken kessah ngo aku, tapi oda kulupaken patinMu.

¹¹⁰Itogongi perjahat ngo aku, tapi oda menurimpang aku i sinidokkenMu.

¹¹¹PerèntahMu ngo pusakkangku soh mi sidekkahna, sipeloloken ukurku.

¹¹²Kuharkatken ngo menguèi hatorenMu soh mi punca nggelluhku.

¹¹³Kukekelengi ngo pati-patinMu, kukecegoken ngo kalak siso tuhu-tuhu setia baMu.

¹¹⁴Kono ngo menampati bak simengkelungkumi aku, merkeposen taba bagah-bagahMu ngo aku.

¹¹⁵Alè kalak jahat, pedaoh mo baku nai! Naing kuuèi perèntah sinidokken Dèbatangku.

¹¹⁶Pergegohi mo aku rembang bagè siniperbagahMu asa nggelluh aku, ulang belli aku terdehèrep ibas pengharapenku.

¹¹⁷Tongkelli mo aku asa merkinijuah aku, janah dak tong mendatèken perèntahMu.

¹¹⁸Itulak kono ngo kalak simenirpang i hatorenMu nai, magosia sambing ngo akkal macik kalak i.

¹¹⁹Karina kalak jahat iètong kono ngo dosken empak-empak, kumerna kukekelengi ngo hatorenMu.

¹²⁰Menggirgir ngo aku kumerna buradan midah kono, bukbak pusuhku meradepken keputusenMu.

¹²¹Enggo ngo kuulaken sintèger janah bennar, ulang mo sohken aku mi tangan musuhku.

¹²²Merpadan mo Ko magahken urupenmu ngo aku, ulang duè aku idersa kalak sindates merukur.

¹²³Maker matangku memèma pengurupienMu lako paluahken, kupèma-pèma keluahen siniperbagahmu.

¹²⁴Baing mo baku rembang bagè pengkekelengimu, janah ajarken baku hatorenMu.

¹²⁵NaposoMu ngo aku, bakin mo aku mengantusi, asa kuantusi perèntah.

¹²⁶Alè JAHOWA, enggo dapet tikkina Kono melaga, kumara mèduk kalak enggo mengelausi patinMu.

¹²⁷Kukekelengi ngo perèntah-perèntahMu lebbih daripada emmas, lebbihen daripada emmas tulèn.

¹²⁸Kumara i nggelluh aku rembang bagè karina sinipeddahkenMu; kukecegoken ngo pengelako menurimpang.

¹²⁹Tuhu-tuhuna sikelengangenken ngo hatoren-hatorenMu, nai kuuèi mo ibas nasa ukurku nai.

¹³⁰Mula ipeterrang, memerèken kecihuren ngo peddahMu, memerèken pengantusien bai kalak jelma keteremmen.

¹³¹Mengkas-engkas ngo kessahku, kumara mengketedohken perèntahMu.

¹³²Dempakken mo aku janah masèh mo atèmu baku, bagè masèh atèmu bai kalak simengkekelengi kono.

¹³³Petegguh mo peningkahku rembang bagè siniperbagahmu, ulang duè aku ikuasai kejahaten.

¹³⁴Paluah mo aku bai kalak simendersa aku nai, asa ndorok kuuèi hatorenMu.

¹³⁵Pasu-pasu mo aku merkitè pekirohMu, janah ajarken mo baku hatorenMu.

¹³⁶Menjarir ngo èluhku bagè laè, kumara oda iuèi patinMu.

¹³⁷Ntèger ngo ko alè JAHOWA, teppat ngo karina hukumMu.

¹³⁸Perèntah-perèntah siniberèkenmu adil janah ndorok terasangken.

¹³⁹Nggerger ngo lagangku ibas diringku kumara ilupaken musuhku peddahMu.

¹⁴⁰Ntegguh ngo padanMu janah kettoken, kelleng kalohon ngo ukurku bana.

¹⁴¹Kalak kèdèk ngo aku janah merlèa, tapi oda kulupaken peddahMu.

¹⁴²Hot ngo ketègerrenMu soh mi sidekkah-dekkahna, janah dak sènteng ngo hukumMu.

¹⁴³Sempa ngo baku kepenjetten bak kesusahen, tapi hatorenmu peloloken ukurku.

¹⁴⁴Dak ntèger ngo hatorenMu; berrè mo baku pengantusien asa nggelluh aku.

¹⁴⁵Dilo-dilo ngo aku ibas nasa ukurku nai baMu; aloi mo aku alè JAHOWA, uè ngo aku menguèi perèntahMu.

¹⁴⁶Kudiloken ngo baMu; paluah mo aku, naing ciranggun ibas hatorenMu ngo aku.

¹⁴⁷Siceggen ndungo ngo aku janah tenggo-tenggo mengido pengurupien; kuharapken ngo bagah-bagahMu.

¹⁴⁸Suntuk berngin aku ndungo, lako pekoser-koserken peddahMu.

¹⁴⁹Dak dengkohken mo aku kumarna kelleng atèMu, alè JAHOWA, jamoti mo nggelluhku kumerna ketègerrenMu.

¹⁵⁰Enggo njolmit kalak simenjalang aku, mertaki jahat ngo kalak i janah oda isuihken patinMu.

¹⁵¹Tapi njolmit ngo ko alè JAHOWA, tuhu ngo karina sinidokkenMu.

¹⁵²Arnia nai ngo kubettoh merkitè pemeddahiMu, magahken kono ngo petettahken i soh mi sidekkah-dekkahna.

¹⁵³Tengen mo kinidersangku janah paluah mo aku, kumara oda ngo kulupaken patinMu.

¹⁵⁴Bela mo perkarangku janah paluah mo aku; perkinijuahi mo aku rembang bagè siniperbagahMu.

¹⁵⁵Kalak perjahat oda iperkinijuahi, kumerna oda iuèi hatorenMu.

¹⁵⁶Mbelgah kalohon ngo masèh atèMu, alè JAHOWA, perkinijuahi mo aku rembang mi ketègerrenMu.

¹⁵⁷Nterrem ngo kalak memusuhi dekket mengletlet aku, tapi oda kulupaken hatorenMu.

¹⁵⁸Ceggo ngo atèngku midah penelbuh-penelbuh idi; kumarna oda ièkutken kalak i peddahMu.

¹⁵⁹Tengen mo bagi mo kelleng atèngku midah perèntahMu, alè JAHOWA, perkinijuahi mo aku kumarna kelleng atèMu.

¹⁶⁰Karina ngo kataMu sènteng, karina hukumMu sinteger i hot soh mi sidekkah-dekkahna.

¹⁶¹Iletlet kalak simerkuasa ngo aku oda lot sebabna, tapi pellin patinMu ngo kessa kukebiari.

¹⁶²PadanMu memakin lolo ukurku, bagè kalak sikennaen ugasen.

¹⁶³nasa luap kukecegoken, tapi kukekelengi ngo patinMu.

¹⁶⁴Dak pukpuk ngo aku mendokken lias atè baMu, kumerna patinMu si sènteng i.

¹⁶⁵Menak janah sennang ngo kalak simengkekelengi patinMu, oda lot sindorok mengambati kalak i.

¹⁶⁶Kupèma-pèma ngo keluahen baMu nai, alè JAHOWA, kuulaken ngo perèntah-perèntahMu.

¹⁶⁷Kuuèi ngo karina nasa hatoren-hatorenMu, janah mengkekelengisa ibas karina ukurku nai.

¹⁶⁸Kupatuhi ngo perèntah dekket sinipeddahkenMu, kumarna idah Kono ngo karina perulaenku.

¹⁶⁹Katerra pè sakat mo dilo-dilongku baMu, alè JAHOWA, berrè mo baku pengantusien, rembang bagè siniperbagahMu.

¹⁷⁰Duè mo soh baMu pengidoenku, perkinijuahi mo aku rembang bagè siniperbagahMu.

¹⁷¹Dak naing kupoji ngo, kumarna iajarken kono baku hatorenMu.

¹⁷²Naing kuendèken ngo tersèngèt bagah-bagahMu, kumerna ntèger ngo karina sinidokkenMu.

¹⁷³Katerra pè uè mo kono mengurupi aku, kumerna kuteddo lako mengèkutken hatorenMu.

¹⁷⁴Iketedohken ukurku ngo keluahen siroh baMu nai, patinMu peloloken ukurku.

¹⁷⁵Duè mo aku nggelluh, asa kupoji Kono, katerra pè hatoren-hatorenMu mo mengurupi aku.

¹⁷⁶Laling ngo aku bagè biri-biri simbalang, roh mo ko, janah tulusi mo naposoMu ènda, kerna oda ngo kulupaken karina sinidokkenMu.