Read Batak Dairi Psalm 12 Bible Online

Psalm 12 - Batak Dairi bible

Psalm 12

¹Psalm si Daud. Bai simenguluken perendè. Mengèkutken logu peualuhken.

²Dak urupi mo kami alè JAHOWA, kumerna oda lot nèngè kalak bujur, enggo mago kalak simenettap setia baMu.

³Mersiluapen ngo kalak i karina samahsa mersiakkal-akkalen merkitè rana selloh beggènken.

⁴Pekom mo rana-rana latlat i, alè JAHOWA, kontam mo kalak sidak tukapkap i,

⁵simendokken “Merkuasa ngo kami merkitè dilah nami! Kadè sambing pè ndorok ngo kudokken kami, janah oda lot sindorok mengambati.”

⁶Nina JAHOWA, “Kalak sipogos itèndes janah kalak simpersuk menderko. Nai karangkenna èn mo Aku roh memerèken kemènaken siniketedohken kalak i.”

⁷Ntegguh ngo padan JAHOWA janah ndorok terasangken, codi bagè pirak tulèn sinioji ibas api.

⁸Kadap ngo kalak perjahat barang mikè sambing, gennep jelma menjungjungken kejahaten. Tapi ijamoti Kono ngo kami, alè JAHOWA, jamotken mo kami meradepken kalak perjahat idi.