Read Batak Dairi Psalm 135 Bible Online

Psalm 135 - Batak Dairi bible

Psalm 135

¹Poji mo JAHOWA! Poji mo gerar JAHOWA, kènè alè karina naposoNa

²simertumpu i Bages JAHOWA i bekkas merian Dèbatanta.

³Poji mo JAHOWA, kerna permendè basa ngo Ia, poji mo gerarNa, kumara permasèh atè ngo Ia.

⁴Ipilih ngo bana si Jakob, bangsa Israel ibakin gabè milikNa.

⁵Kerna kubettoh mersangap kalohon ngo JAHOWA, mehangga ngo Ia mengelebihi karina sembahen.

⁶Ibakinken ngo kadè ipergeddo ukurNa, i langit bak i tanoh èn, i laut dekket i laut mbellang simbages kalohon.

⁷Roh ngo ibaing hembun i punca tanoh èn nai, ibakin ngo perkas pertanda udan. Nai iperèntah mo angin asa karuar i bekkas pemeneppenNa nai.

⁸Ibunuh ngo karina anak buka baju i Mesir bai jelma nai bang i binatang pè.

⁹Mèduk ngo ibakin i sidi kelengangen dekket tanda lako menghukum raja dekket karina pugabèna.

¹⁰Mèduk ngo bangsa ibinasaken dekket memunuh raja-raja simergegoh kalohon:

¹¹si Sihon raja Amori dekket si Og raja Basan, bak karina raja i Kanaan.

¹²Nai isohken mo nagerri kalak i gabè milik kalak Israel, bangsaNa i.

¹³Alè JAHOWA, tong ngo kono iberitaken, janah gerarMu ièngèt karina cundut,

¹⁴kerna iberèken Kono ngo ketègerren bai bangsaMu, janah mermasèh atè bai naposo-naposoMu.

¹⁵Gana-gana emmas dekket pirak kalak i, sinipekadè tangan jelma ngo.

¹⁶Lot ngo babah kalak i, tapi oda ndorok mengerana, mermata, tapi oda merpendidah.

¹⁷Lot ngo coping kalak i, tapi oda merpendengkoh, oda lot huap kessah ibas babahna nai.

¹⁸Katerra pè bagidi mo nasip kalak simemahansa, bak sipercaya bana.

¹⁹Poji mo JAHOWA, kènè alè bangsa Israel, poji mo Ia, kènè alè imam-imam Dèbata!

²⁰Poji mo JAHOWA, kènè alè kalak Lewi, poji mo Ia, kènè karina simerkebiaren bana.

²¹Poji mo JAHOWA i Sion, i Jerusalem bekkasNa. Poji mo JAHOWA!