Read Batak Dairi Psalm 136 Bible Online

Psalm 136 - Batak Dairi bible

Psalm 136

¹Mendokken lias atè mo bai JAHOWA, kumerna permendè basa ngo Ia, menettap ngo masèh atèNa.

²Mendok lias atè mo bai Dèbata Si sada-sada i; menettap ngo masèh atèNa.

³Mendokken lias atè mo bai JAHOWA Sintèmbul kalohon i; menettap ngo masèh atèNa.

⁴Pellin Ia ngo simemaing kelengangen kelengangen mbellen; menettap ngo masèh atèNa.

⁵Merkitè kebijakenNa ihanaken Ia langit; menettap ngo masèh atèNa.

⁶Iamakken ngo tanoh èn i babo laè; menettap ngo masèh atèNa.

⁷Ibakin ngo penendang i langit; menettap ngo masèh atèNa.

⁸Mataniari mengerajai mahar; menettap ngo masèh atèNa;

⁹bulan dekket bintang mengerajai berngin; menettap ngo masèh atèNa.

¹⁰Ibunuh ngo anak buka baju i Mesir; menettap ngo masèh atèNa.

¹¹Ibabai ngo mbungkas Israel i Mesir nai; menettap ngo masèh atèNa;

¹²merkitè tangan mergegoh janah mahantu; menettap ngo masèh atèNa.

¹³Ibellah ngo laut Arngo; menettap ngo masèh atèNa;

¹⁴Iembah ngo Israel bangsaNa i suberrang; menettap ngo masèh atèNa.

¹⁵Tapi raja Mesir bak balapergunggungna ilennengken ngo; menettap ngo masèh atèNa.

¹⁶Iuluken ngo bangsaNa memellus tarap padang gurun; menettap ngo masèh atèNa.

¹⁷Italuken ngo raja-raja mahantu; menettap ngo masèh atèNa;

¹⁸ibunuh ngo raja-raja sitermurmur; menettap ngo masèh atèNa.

¹⁹Si Sihon, raja Amori; menettap ngo masèh atèNa;

²⁰dekket si Og, raja Basan; menettap ngo masèh atèNa.

²¹Isohken ngo nagerri kalak i bai bangsaNa; menettap ngo masèh atèNa;

²²gabè milik Israel naposoNa; menettap ngo masèh atèNa.

²³Oda ngo ilupaken kita tikan italuken kita; menettap ngo masèh atèNa.

²⁴Ipaluah ngo kita i tangan musuh nai; menettap ngo masèh atèNa.

²⁵Nasa singgelluh iberèken ngo mangan; menettap ngo masèh atèNa.

²⁶Mendokken lias atè mo bai Dèbata penguasa langit; menettap ngo masèh atèNa.