Read Batak Dairi Psalm 139 Bible Online

Psalm 139 - Batak Dairi bible

Psalm 139

¹Bai simenguluken perendè. Psalm si Daud. Alè JAHOWA, ibettoh Kono ngo sinibagasen ukurku janah itandai kono ngo aku.

²Ibettoh Kono ngo karina perulaenku; i sindaoh nai pè iantusi kono ngo perukurenku.

³Idah kono ngo aku, bang karèjo aku barang mentadi, ibettoh kono ngo karina sikubahanken.

⁴Salang sinderrang mak dèng pè aku mongkam, ibettoh kono ngo barang kadè sinaing kudokken.

⁵Ikulilingi kono ngo aku i karina arah nai, janah ikelungkumi kono ngo aku merkitè kuasaMu.

⁶Mbagessu ngo baku perbinettohenMu idi, oda terradumen pikirenku.

⁷Mikè mo aku ndorok laus asa mpellut i kuasaMu nai? Mikè mo aku ndorok mperrus asa ndaoh i hadeppenMu nai?

⁸Mula laus aku mi langit, i sidi ngo Ko, mula meddem aku i bekkas simatè, tong ma ngo Ko lot i sidi.

⁹Mula ngkabang aku memellus arap bekkas mataniari mbincar barang merian i punca kesunduten sindaohna kalohon,

¹⁰i sidi pè iurupi kono ngo aku; i sidi pè iteggu-teggu tanganMu ngo aku.

¹¹Mula kupidoken asa isangkemmi sigellap aku, janah nterrang simengkulilingi aku gabè berngin,

¹²nai singgellap idi pè oda ngo gellap baMu; berngin idi nterrang bagè mahar, janah gellap i bagè nterrang.

¹³Kono ngo menghanaken karina sendihi dagingku, janah mengerumang aku ibagasen beltek inangku.

¹⁴Kupoji ngo Ko kumara lègan kalohon aku! Kelengangen ngo karina pemakinMu janah pebengapken, satdar tuhu-tuhu ngo aku tersèngèt i.

¹⁵Tikan itempa tulan-tulanku, seppè ipedemmu i bagasen beltèk inangku, sidang sellet aku i sidi ibagasen rusia, oda ngo mboni aku baMu.

¹⁶Idah kono ngo aku tikan i bagasen kurungen manik dèng pè; karinana tersurat ngo ibagasen bukkuMu; karina arina enggo kin itentuken sinderrang sada poda dèng itubennai.

¹⁷Mahalna i kuantusi pikirenMu, alè Dèbata, janah mbuè kalohon bilangenna!

¹⁸Mula kubilangi, buèen dèng dari pada kersik; mula ndungo aku, dak tong ngo kupikiri Kono.

¹⁹Katerra pè, idungi ko mo kalak perjahat, alè Dèbata, pedaoh mo kalak simengorèken daroh bangku nai!

²⁰Jahat ngo iranaken kalak i tersèngèt Kono, janah mersumpah luap lako merolihken karina kutaMu.

²¹Alè JAHOWA, ceggo ngo atèngku taba kalak simerceggo atè bamu, ncio ngo atèngku taba kalak simengalo Kono!

²²Ceggo kalohon ngo atèngku bai kalak i, janah kuètong dosken musuh.

²³Pemanat mo aku alè Dèbata, siahi mo ukurku, oji mo aku janah bettoh mo perukurenku.

²⁴Tengen mo tah lot kejahaten ibas diringku, janah teggu mo aku i dalan simenettap.