Read Batak Dairi Psalm 140 Bible Online

Psalm 140 - Batak Dairi bible

Psalm 140

¹Bai simenguluken perendè. Endè si Daud.

²Paluah mo aku bai kalak perjahat nai, alè JAHOWA, dak jamoti mo aku meradepken kalak simemaingken kekerasen.

³Mertaki jahat ngo kalak i ibas ukurna, janah gennep ari maing perubaten.

⁴Codi bagè nipè merbisa ngo dilah kalak i, rana-rana kalak i codi bagè bisa nipè senduk.

⁵Alè JAHOWA, legenni mo aku i kuasa jelma jahat nai, jamoti mo aku meradepken kalak simemaingken kekerasen simertaki lako mendabuhken aku.

⁶Sipsip ngo kalak jukkat menogongi aku, janah pekimbangken aring lako menangkup aku. Mengèkut dalan ibaing kalak i ngo togong-togong lako menengkik aku.

⁷Alè JAHOWA, ningku ngo: Kono ngo Dèbatangku, peratè-atèken mo sodip pengidoenku.

⁸JAHOWA, Dèbatangku, simergegoh paluahken aku, enggo ijamoti kono aku i pergerahaen.

⁹Ulang uèi pengidoen kalak perjahat, alè JAHOWA, ulang duè sahun taki kalak i.

¹⁰Ulang duè mennang musuhku; bakin mo rana-rana jahat siniruapken kalak i sempa bai kalak simenelbuh aku.

¹¹Belli mo kalak i idurusi rara api, janah iambongken mi bagasen luhung kematèen, asa ulang ndorok nè mendarat.

¹²Belli mo kalak simengulaken kekerasen iserpai mara ulang duè penelbuh mengiani tanoh èn.

¹³Kubettoh ibaingken Kono ngo kesèntengen bai kalak sitertèndes, janah mengampini perkara kalak sincor.

¹⁴Dak ipoji kalak si bujur mo Ko; merian mo kalak i rebbak dekket ko.