Read Batak Dairi Psalm 141 Bible Online

Psalm 141 - Batak Dairi bible

Psalm 141

¹Psalm si Daud. Kutenggoken ngo bamu, alè JAHOWA, sudu mo mengurupi aku! Dak dengkohken mo aku mula dilo-dilo baMu.

²Jalo mo sodipku sikira pèlèen dahupa, dekket tanganku sikupekerbang sikira pèlèen berngin.

³Alè JAHOWA, jamoti mo babahku janah perdimata bibirku.

⁴Pedaoh mo aku i cubellek mengulaken jahat nai. Ulang duè aku mersaor dekket kalak durhaka barang dekket mangan i pèsta kalak i.

⁵Mula lot sada kalak bujur memincang aku, janah dekket ukur bujur mengajar aku, codi bagè minak simerandal kalohon ngo i baku. Katerra pè ulang mo nemmu kutulak ia, kumara dakdak mersodip ngo aku mengalo kejahaten kalak i.

⁶Mula perkuasa-perkuasa kalak i ionjemken i lingling batu nai, bettohen kalak i mo tuhu karina ranangku.

⁷Ipenghamburken mo tulan-tulanta i biding pendèbaen codi bagè sada batu i lala mi tanoh.

⁸Tapi dak tong ngo aku mergantung bamu, alè JAHOWA Dèbatangku, ulang mo duè aku matè, kumerna culendung baMu ngo aku.

⁹Jamoti mo aku i togong-togong sinitogongna baku, i togong-togong perjahat-perjahat idi nai.

¹⁰Bakin mo kalak i ndabuh mi bagasen togong-togong kalak i sendiri, tapi katerra pè njuah-njuah mo aku.