Read Batak Dairi Psalm 143 Bible Online

Psalm 143 - Batak Dairi bible

Psalm 143

¹Endè si Daud. Alè JAHOWA, dengkohken mo sodipku, peratè-atèken mo pengidoenku. Aloi mo aku kumerna mendè basaMu, uèi mo sodipku kumara kesèntengenMu.

²Naposomu ngo aku èn, ulang mo hukumi aku, kumerna oda lot kalak siso mak mersalah i hadeppenMu.

³Enggo iletlet janah italuken musuhku aku, janah memelukken aku mi bagasen kurungen gellap; codi bagè kalak sienggo ndekkah matè ngo aku.

⁴Enggo mendellè pengakapku, maknè kubettoh tumburenku.

⁵Kuèngèt ari-ari sienggo laus; kuradum-radumi karina pemakinMu, kupekoser-koser karina sinibahanMu.

⁶Kupekimbang ngo tanganku mersodip taba ko; bagè tanoh ngkerrah, tendingku mengketedohken Ko.

⁷Sudu mo mengaloi aku, alè JAHOWA, kumara enggo mendellè aku. Ulang boniken dirimu baku nai, asa ulang aku bagè kalak sienggo susur mi kematèen.

⁸Gennep ceggen pesèngèt aku i masèh atèMu, kerna mengharapken kono ngo aku. Tuduhken mo baku dalan sipatut kudalani, kumara taba kono ngo aku mersodip.

⁹Roh aku naing culèndung baMu, alè JAHOWA, paluah mo aku bai musuh-musuhku nai.

¹⁰Ajari mo aku mengulaken sinipergeddoMu, kumerna kono ngo Dèbatangku. Permendè basa ngo ko, janah meneggu-neggu aku i dalan ndèas.

¹¹Dak paluah mo aku rembang bagè siniperbagahMu, alè JAHOWA, kumernaken mendè basaMu, paluah mo aku i kepenjetten nai.

¹²Merkitèken masèh atèMu tumpatken mo karina musuhku, binasaken mo karina simendersa aku, kerna naposoMu ngo aku.