Read Batak Dairi Psalm 144 Bible Online

Psalm 144 - Batak Dairi bible

Psalm 144

¹Bai si Daud nai. Poji mo JAHOWA simenjamoti aku! Ilatih ngo aku juhap, janah iajari aku mergeraha.

²Ia ngo mengurupi dekket menampati aku, sipaluahken aku bekkasku culèndung. Ia mengkelungkumi aku, bekkasku mengusi, ipetunduk ngo bangsa-bangsa taba aku.

³Alè JAHOWA, kadè pana jelma i asa iperdatèken kono ia? Isè pana ia asa isarihken Kono ia?

⁴Codi ngo jelma i bagè sengembus angin, bagè lèndung memellus, bagidi ngo nggelluhna.

⁵Alè JAHOWA, buka mo langitMu janah susur mo ko, gerrit mo delleng-delleng asa mercèmpul.

⁶Kebekken mo perkasMu asa sompar-baèr musuh, paluah mo panahMu asa gontar kalak i.

⁷Doroken mo tanganMu i sorga nai, janah paluah mo aku i laè merginja nai. Paluah mo aku i kuasa kalak sidèban nai

⁸kalak kucul merluap janah mengkilang, dekket mersumpah palsu.

⁹Kuendèken mo endè rimbaru baMu, alè Dèbata, janah menggerrit kucapi ninganna merendè.

¹⁰Iberèken kono ngo kemenangen bai raja-raja, janah paluahken si Daud naposoMu.

¹¹Paluah mo aku i peddang kalak jukkat nai; paluah mo aku i kuasa kalak sidèban nai kalak kucul merluap dekket mengkilang, dekket mersumpah palsu.

¹²Katerra pè dak mo karina dukak-dukakta daholi tikan ibas kenaposoenna bagè suan-suanen ndeppur mbellen. Katerra pè karina berrunta bagè tihang merandal, simenghias gennep soki istana.

¹³Katerra pè dom mo sin langgih-langgihta dekket mermatcam bagè hasil ndiula. Katerra pè biri-biri sinijampalenta meranaki soh merpuluh ribu buèna.

¹⁴Katerra pè merrik mo lembunta janah oda lot bennè barang mermatèen. Katerra pè ulang lot terdengkoh derko mpersah i gennep dalan kutanta.

¹⁵Sayurntua mo bangsa sibagidi, sayurntua mo ummat simemaing JAHOWA Dèbatana!