Read Batak Dairi Psalm 145 Bible Online

Psalm 145 - Batak Dairi bible

Psalm 145

¹Pemojien bai si Daud nai. Naing kupetunggung ngo Kono, alè Dèbatangku janah Rajangku, janah memoji Kono soh sidekkah-dekkahna.

²Gennep ari naing mendokken lias atè aku baMu, janah pesangapken Kono soh sidekkah-dekkahna.

³Kumarna mehangga ngo JAHOWA janah terpoji kalohon, oda terradumen kebelgahenna.

⁴Turun-tumurun naing ipoji jelma pemakinMu janah menukutken kegegohenMu mahantu i.

⁵Naing iberitaken kalak i ngo kinihangga bak kemuliaenMu, kupekoser-koser mo pemakinmu mahangga i.

⁶Isukutken kalak i ngo karina pemakinMu mahantu i, kumongmongken mo kinibelgahmu idi.

⁷Isukutken dèba mo karina mendè basaMu janah merendè tersèngèt kesèntengenMu.

⁸Perkelleng janah permasèh atè ngo JAHOWA melaun melaga janah dak tong mermasèh atè.

⁹Mbuas ngo ia bai karina kalak, janah mengkekelengi karina sinitempana.

¹⁰Karina tinempaMu memoji Kono, alè JAHOWA, karina bangsaMu mendokken lias atè baMu.

¹¹Ipetunggung kalak i ngo kuasaMu bagè Raja, janah menukutken kemahantunMu,

¹²asa karina kalak bettoh-betohen pemakinMu simbelgah i, bagi dekket kerajaenMu simermulia janah meriah idi.

¹³Hot ngo pemerèntahenMu soh segen, kuasaMu mertahan turun-tumurun. Setia ngo JAHOWA i karina bagah-bagahNa, dom masèh atè ngo Ia ibas karina pemakinNa.

¹⁴Iurupi JAHOWA ngo kalak sinibagasen kesusahen, ipedorgak ngo kalak si tungkuk.

¹⁵Karina singgelluh ciranggun taba Kono; iberrè kono ngo kalak i mangan i katikana.

¹⁶Ipesuntuk kono ngo karina siniperluken kalak i, asa ulang kurangen kalak i.

¹⁷Sènteng ngo JAHOWA ibas karina pemakinNa janah dom masèh atè ibas karina pemaingNa.

¹⁸Njolmit ngo ia bai kalak simenenggoisa, janah simengido tabasa ibagasen perukuren mbersih nai.

¹⁹Ipesennang ngo penarihen kalak simerkebiaren bana; idengkohken ngo dilo-dilo kalak i janah memperkinijuahi kalak i.

²⁰Ijamoti ia ngo gennep jelma simengkekelengisa, tapi ibinasaken ngo kalak perjahat.

²¹Dak dak naing kupoji ngo JAHOWA, katerra pè karina sinihanakenna memoji gerar JAHOWA soh mi sidekkah-dekkahna.