Read Batak Dairi Psalm 147 Bible Online

Psalm 147 - Batak Dairi bible

Psalm 147

¹Poji mo JAHOWA! Kumerna merandal ngo memoji Ia, janah pesennangken ukur ngo mengendèken pemojien baNa!

²Pesuangen JAHOWA ngo balik Jerusalem; iembah nola ngo balik karina siterbuang.

³Ia pemalum ukur kalak sibonek, janah memalut ugah-ugah kalak i.

⁴Ia ngo menentuken bilangen bintang i langit, janah karina ibaing gerarNa.

⁵Mbelgah kalohon janah mahantu ngo JAHOWA Dèbatanta, oda tersipat kebijakenNa.

⁶Ipecèndek ia ngo kalak sitertèndes, tapi ukum kalak perjahat ipatakken mi tanoh.

⁷Endèken mo pemoji-mojien bai JAHOWA, persora mo kucapi bai Dèbatanta.

⁸Ia ngo pekimbangken hembun i langit; Ia pehantarken udan mi tanoh èn, dekket memaing turah dukut i uruk-uruk.

⁹Ia memerèken pangaen bai pinakan, dekket bai anak kak sipiak-piak.

¹⁰oda ngo kuda mergegoh ikelemoken JAHOWA; oda ma pakalima berani.

¹¹Sennang ngo atè JAHOWA midah kalak simerkebiaren bana, taba kalak si dak tong ciranggun mi masèh atèNa.

¹²Poji mo JAHOWA, alè Jerusalem! Poji mo Dèbatamu, alè Sion!

¹³Kumerna Ia ngo petegguhken pèntu-pèntu pengkeruhenmu, dekket memasu-masu jelma pengisimu.

¹⁴Ijamoti ngo ladangmu asa dak tong mènak, janah memessuri kono dekket pagè simerandalna.

¹⁵Ibakin ngo perèntah mi tanoh èn, janah mènter iulaken ngo sinidokkenna.

¹⁶Ia ngo pesusurken hembun batu bagè kapas, dekket menghamburken hembun kimpal bagè abu.

¹⁷Irurus ngo udan baho bagè batu anak; oda lot tahan menggongken merngalina.

¹⁸Nai merkitè perèntahNa melala mo baho i; isempulken mo angin, nai menjarir mo laè i.

¹⁹Iberèken ngo tennahNa bai bangsaNa, hatoren dekket patinNa bai bangsa sinipilihNa.

²⁰Oda ngo bagi ibakin ukum bai bangsa-bangsa sidèban, oda ngo itandai kalak i pati-patinNa. Poji mo JAHOWA!