Read Batak Dairi Psalm 17 Bible Online

Psalm 17 - Batak Dairi bible

Psalm 17

¹Sodip si Daud. Dengkohken mo dilo-dilongku mengidoken ketègerren, datèken mo sodipku tutus, alè JAHOWA.

²Sudu mo menampati perkarangku karna ibettoh Kono ngo barang kadè bennar.

³Mula ioji Kono perukurenku janah roh kono memerèso aku tikan berngin, jupa kono mo tutus ngo ukurku; rembang ngo ranangku dekket pikirenku.

⁴Kuulaken kadè sinidokkenmu janah oda kudalani lapang kejahaten.

⁵Dak ngo aku mengèkutken sinipedahkenMu janah oda menirpang i sidi nai.

⁶Tenggo-tenggo ngo aku baMu, alè Dèbata, kumerna ialoi Kono ngo aku; datèken mo aku janah dengkohken mo ranangku.

⁷Pacidah mo masèh atèMu simerkesurungen i kumerna ipaluah Kono ngo kalak siculèndung baMu, mènak ngo kalak i gembarmu, ipas penjuhap musuh nai.

⁸Dak jamoti mo aku codi bagè anak mataMu, boniken mo aku i terruh kabengMu

⁹meradepken penjuhap kalak perjahat. Ikubu musuh ngo aku lako naing memunuh aku;

¹⁰oda itandai kalak i masèh atè janah tunggang mengerana.

¹¹Roh ngo kalak i mengalo aku janah mencingkoi aku, menulusi kesempaten lako menembemken aku.

¹²Bagè biahat ngo kalak i lako menjerngem panganna, bagè biahat bajar mengerimrim i bekkas mboni.

¹³Kèkè mo ko alè JAHOWA, alo mo musuhku janah taluken mo kalak i. Paluah mo aku merkitè pedangMu meraloken penjuhap kalak perjahat.

¹⁴Paluah mo aku bai kalak simenèmbun harta i dunia. Hukum mo kalak i merkitè olpek sienggo ipehantar Ko bai kalak i. Belli mo bak kempu kalak i pè ihukum ma.

¹⁵Tapi ukum aku dak kutatap ngo Ko, kumerna oda mersalah aku. Tikan ndungo aku, pekirohMu memakin lolo ukurku.