Read Batak Dairi Psalm 18 Bible Online

Psalm 18 - Batak Dairi bible

Psalm 18

¹Psalm si Daud, naposo JAHOWA. Bai simenguluken perendè. Iendèken taba JAHOWA tikan ipaluah si Daud bai si Saul nai dekket bai karina musuhna nai.

²Ngkelleng ngo atèngku baMu, alè JAHOWA, Kono ngo kegegohenku.

³Bagè bèntèng ntegguh ngo JAHOWA bekkasku culèndung. Bagè delleng batu ngo Dèbatangku bekkasku culèndung. Bagè tambeng-tambeng ngo Ia mengkelungkumi aku, janah menjamoti aku asa dak tong mènak.

⁴Dilo-dilo ngo aku taba JAHOWA sipatut nipoji, Ipaluah ngo aku bai musuh-musuhku nai.

⁵Ikulilingi mara kematèen ngo aku, janah iremrem laè kemagoen.

⁶Ikulilingi mara kematèen ngo aku, sensen ngo jarat kematèen i lebbèngku.

⁷Tikan ibas tersessak aku dilo-dilo ngo aku taba JAHOWA, pingko-pingko ngo aku taba Dèbatangku mengido pengurupien. Idengkohken ngo sorangku i bagesNa nai janah mendatèken dilo-dilongku.

⁸Nai tumuyu-tuyu janah dumegger mo tanoh èn, dumegger janah mogot-ogot mo dangaen delleng kemulihken pungur Dèbata.

⁹Mertiup mo cèmber i lubang ègungNa nai, remuar mo api bak rara ibas babahNa nai.

¹⁰Ibellah mo langit, nai susur mo Ia merdengan hembun gellap i terruh nèhèNa.

¹¹Ngkabang ngo ia mengkunduli kerub; mayap-ayap ngo Ia i babo kabeng angin.

¹²Iboniken ngo diriNa merkitè sigellap; hembun batu ngo mengkulilingisa.

¹³Ipas pellian i lebbèNa nai, remuar mo hembun, baho dekket api.

¹⁴Nai bagè renggur mo sora JAHOWA i langit nai; ipedengkohken Sintèmbul i mo soraNa.

¹⁵Itèmbakken mo panah-panahNa janah menompar-baèrken musuh; Ipencalitken mo perkas pukpuk, janah memakin kalak i mperrus.

¹⁶Taridah mo dangaen laut janah mbuka alas tanoh tikan isenggak JAHOWA musuhNa merdengan laga.

¹⁷Idoroken JAHOWA mo tanganNa i babo nai; icekkel ngo aku janah iruah ibas laè simbages nai.

¹⁸Ipaluah ngo aku bai musuh simergegoh nai dekket bai kalak simengkecegoken aku nai, kumerna mergegohen ngo kalak i baku.

¹⁹Ijuhap kalak i ngo aku tikanna sempa sitahanen baku, tapi JAHOWA ngo mengurupi aku.

²⁰Ipaluah ngo aku ipas mara nai janah memperkinijuahi aku kumarna lemmo ngo atèna baku.

²¹Ibales JAHOWA ngo perulaenku sibennar; ipasu-pasu ngo aku kumerna aku oda mersalah.

²²Da kuuèi ngo perèntah JAHOWA janah oda kutadingken Dèbatangku.

²³Kudatèken ngo karina patinNa, perèntah-perèntahNa oda ngo kulembèken.

²⁴Ibettoh ngo oda mertikas aku janah kupedaoh diringku i kejahaten nai.

²⁵Nai ibales JAHOWA mo perulaenku bennar kumerna Ibettoh ngo ada ngo aku mersalah.

²⁶Alè JAHOWA setia ngo Ko taba kalak setia janah selloh taba kalak selloh.

²⁷Taba kalak simbadia ipetarar Kono diriMu mbadia, tapi ukum kalak jahat ialo Kono.

²⁸Iperkinijuahi kono ngo kalak sincerrep merukur, tapi ipepatu kono ngo kalak sindates merukur.

²⁹Kono ngo mengelakati pelitangku; JAHOWA Dèbatangku ngo menendangi kegellapenku.

³⁰Ipergegohi kono ngo aku lako menumpat musuh; merkitè pengurupi Dèbatangku kulentem pertahanen kalak i.

³¹Sondel merandal ngo pemakin Dèbata kettoken ngo jandi JAHOWA. Bagè tambeng-tambeng ngo ia bai karina kalak siculèndung tabasa.

³²Kumerna pellin JAHOWA ngo kessa Dèbata; Dèbata sambing ngo mengampini kita.

³³Ia ngo Dèbata mempergegohi aku janah memakin mènak dalanku.

³⁴Ipergegohi ngo nèhèngku bagè nèhè balkih, janah menjamoti kessahku i tengah ndelleng.

³⁵Iajari ngo aku mergeraha, maingkensa ndorok aku menintak baor sintegguhna kalohon.

³⁶Alè JAHOWA, ijamoti janah ipaluah kono ngo aku, janah menoat aku merkitè kuasaMu; gabè mennang ngo aku kemulihken pemaingMu.

³⁷Ijamoti kono ngo aku asa ulang tertaban aku, janah oda nung talu aku.

³⁸Kujalang musuhku janah kutaluken kalak i, janah pantang mundur soh ripas kalak idi.

³⁹Kupentembemken kalak i soh mak nè ndorok kèkè, geppah kalak i oda nè mergoldè i lebbè nèhèngku.

⁴⁰Iberrèken kono gegoh baku lako geraha, dekket kemenangen meraloken karina musuhku.

⁴¹Mperrus ngo musuhku ibakin ko i lebbèngku nai; ibinasaken kono ngo kalak simerceggo atè taba aku.

⁴²Pingko-pingko ngo kalak i, tapi oda lot mengurupi, tenggo-tenggo ngo kalak i taba JAHOWA, tapi oda ialoi.

⁴³Kulala ngo kalak i bagè abu merhamburen, janah kupais bagè kubang i dalan.

⁴⁴Ipaluah kono ngo aku bai horong durhaka nai, janah memaingken aku mengerajai bangsa-bangsa; bangsa siso kutandai gabè hambangku.

⁴⁵Tunduk ngo kalak sidèban taba aku janah patuh mula mendengkoh perèntahku.

⁴⁶Enggo bennè keberanien kalak i; menggirgir ngo kalak i janah mendarat i parikna nai.

⁴⁷Nggelluh ngo JAHOWA! Dak terpoji mo simenampati aku! Oangken mo kebelgahen Dèbata sipaluahken aku!

⁴⁸Ia pemenangken aku meraloken musuhku; italuken ngo bangsa-bangsa i hadeppenku,

⁴⁹iperkinijuahi ngo aku ipas musuh-musuhku nai. Alè JAHOWA, iberrèken kono ngo baku kemenangen meraloken musuhku; ijamoti kono ngo aku bai kalak jahat nai.

⁵⁰Nai kupoji mo kono i tengah-tengah bangsa-bangsa, janah kuendèken pemoji-mojien baMu.

⁵¹Kemenangen mbellen ngo iberrèken Dèbata taba rajaNa, dak tong ngo ikekelengi jelma sinipilihNa, imo si Daud dekket pinemparna soh sidekkah-dekkahna.