Read Batak Dairi Psalm 19 Bible Online

Psalm 19 - Batak Dairi bible

Psalm 19

¹Psalm si Daud. Bai simenguluken perendè.

²Langit petararken kemuliaen Dèbata, janah langit simeratah i menori-noriken sinihanakenNa.

³Ari sisada pesakatken taba ari sinaing roh; berngin sisada menukutken taba berngin i podina.

⁴Oda lot simongkam barang mengerana, oda lot terdengkoh sora.

⁵Tapi merginoling ngo sorana mi suberri dunia, sakat ngo tennah i mi punca dunia èn. Ibahan JAHOWA ngo bages i langit bai mataniari,

⁶siceggen dèng enggo mbincar ia, bagè kèla karuar i bilikna nai, bagè lubalang merlolo atè memungkah perdalanenna.

⁷Iagahi ngo langit i punca nai mi puncana; oda lot siso kenna mpilngasna.

⁸Sondel ngo sellohna Patin JAHOWA idi, pepihirken tendi. Kettoken ngo perèntah JAHOWA, memerèken kebijaken bai kalak si borjok.

⁹Teppat ngo hatoren JAHOWA, pesennangken ukur. Sènteng ngo ketetapen JAHOWA idi, memaingken jelma mengarusi.

¹⁰Selloh ngo ulaen menguèi taba JAHOWA idi, merdalan soh mi amman sumendah. Sènteng ngo Patien JAHOWA idi janah ntèger karina.

¹¹Mahargaen ngo Patien JAHOWA daripada emmas tulèn, tenggien daripada tenggoli angin.

¹²Ipesèngèt karina idi ngo naposoMu, hantar ngo upah mbellen bai kalak simenguèisa.

¹³Malot isè satdar mula i kelalingenna; alè JAHOWA, paluah mo aku ibas kesalahen mboni nai.

¹⁴Pedaoh mo aku ibas dosa sinitulun nai, ulang belli aku irajai. Nai gabè siso mertikas mo aku, janah lias ibas pengelausien mberrat nai.

¹⁵Katerra gia lemmo mo atèmu midah rana bak pikirenku, alè JAHOWA, penjamoti bak simenebbus aku.