Read Batak Dairi Psalm 22 Bible Online

Psalm 22 - Batak Dairi bible

Psalm 22

¹Psalm si Daud. Bai simenguluken perendè. Mengèkutken Lagu: Balkih tikan siceggen.

²Dèbatangku, alè Dèbatangku, kasa itadingken Kono aku? Dilo-dilo ngo aku, tapi dak tong ngo Kono ndaoh-ndaoh janah oda iurupi ko aku.

³Alè Dèbatangku dilo-dilo ngo aku tikan mahar, tapi dak sip ngo ko. Mersodip ngo aku tikan berngin, tong ngo oda mènak ukurku.

⁴Bagi nola pè Kono ngo Raja Simbadia kalohon, sinipepoji-poji Israel.

⁵Iharapken empung nami ngo kono, iharapken kalak i, janah ipaluah Kono ngo kalak i.

⁶Tenggo-tenggo ngo kalak i baMu janah ipaluahi pos ngo atè kalak i janah oda terdehèrep.

⁷Tapi goya ngo aku èn, oda jelma, icèdurken janah ilèai jelma mbellang.

⁸Karina ngo kalak simengidah aku, mengerèhè aku, mengobitken bibirna janah mengupirken takal.

⁹Nina kalak i, “Belli mo ia mengasangken JAHOWA, asa ipaluah JAHOWA ia, mula sennang ngo JAHOWA midahsa.”

¹⁰Kono ngo pedaratken aku i kurungen manik nai, janah memaingken aku sennang i abingen inangku.

¹¹Kessa nai tubuh, i tanganMu ngo nasipku, mungkah i kurungen manik nai, Kono ngo Dèbatangku.

¹²Ulang mo ko ndaoh, kumerna enggo njolmit mara, janah oda lot mengurupi.

¹³Bagè perkolan kerbo ngo, musuh mengerengemmi aku, bagè kerbo meriar i Basan nai ngo kalak i mengkubu aku.

¹⁴Idempakken kalak i ngo aku ningan ngangang babahna, bagè biahat merngengngeng bak menjerngem.

¹⁵Kerri ngo gegohku bagè laè ntunah, karina tulanku mertalkasen i sendihina nai, melala atè-atèngku bagè liling.

¹⁶Ngkerrah ngo bergengku bagè ceppik-ceppik koden, lekket dilahku i langit-langit babahku. Alè JAHOWA, itadingken Kono aku i babo abu bagè kalak sienggo matè.

¹⁷Ikubu nuhnuhen kalak perjahat ngo aku; bagè biang ngo kalak i mengerengemmi aku, menjuluki tangan bak nèhèngku.

¹⁸Karina tulanku ndorok kubilang, ipetengen-tengen musuh ngo aku bagè tontonen.

¹⁹Ipella-pellaken kalak idi ngo olesku, janah mertendung kalak i lako merolihken jubahku.

²⁰Tapi ukum Kono, ulang mo ndaoh, alè JAHOWA, sudu mo roh mengurupi aku, kerna Kono ngo gegohku.

²¹Paluah mo kessahku i pedang nai, jamotken aku ibas rengemmen biang nai.

²²Oda mergoldè aku, paluahi mo aku ipas tanduk kerbo bak muncung singa nai.

²³SinibaingMu kusukutken taba kaka-anggingku, tikan perpulungen ummatMu dak kupepoji-poji ngo Kono.

²⁴Poji mo Ia, kènè alè jelma merpenguèi! Pesangap mo Ia, karina kè pemparen Jakob! Sujud mo tabasa, karina kè pemparen Israel!

²⁵Kerna oda ngo iakap merlèa jelma sitertèndes, janah oda melancang ia midah kinipersukna. Oda ngo laus Ia bai kalak i nai, tapi idengkoh ngo mula mido urup ia tabasa.

²⁶I tengah-tengah pulungen ummat kupoji Kono kemulihken karina sienggo nibaingkenmu. I lebbè kalak simerpenguèi kupèlèken pèlèen sikuperbagah i.

²⁷Merotcè-otcè mo mangan kalak sincor; kalak siroh mendahi JAHOWA naing memojisa. Katerra pè sennang mo kènè soh mi sidekkah-dekkahna!

²⁸Suberri bangsa terèngèt bai JAHOWA janah balik tabasa, karina marga, sujud menembahsa.

²⁹Kumarna JAHOWA ngo simerkuasa, Ia memerèntah bangsa-bangsa.

³⁰Karina kalak Simbelgah sujud i hadeppenNa, karina jelma simangko-angko sujud menembahsa.

³¹Cundut-cundut silako roh pè dak merpenguèi taba JAHOWA, dak ngo Ia isukutken turun-tumurun.

³²Ibagahken taba bangsa situbuh podien magahken enggo ipaluah JAHOWA ummatNa.