Read Batak Dairi Psalm 25 Bible Online

Psalm 25 - Batak Dairi bible

Psalm 25

¹Psalm si Daud. Taba kono ngo, alè JAHOWA kusodipken sodipku,

²alè Dèbatangku, tok ngo ukurku baMu! Ulang duè aku ipemèla, bak isuraki musuh-musuhku.

³Kalak simenelbuh kono kennah termèla, tapi kalak sipercaya baMu oda terdehèrep.

⁴Tuduhken mo hendakMu baku, alè JAHOWA, bagahken mo kadè sikennah kuulaken.

⁵Ajari janah teggu-teggu mo aku asa nggelluh bagè sinikelemokenMu, kumerna Kono ngo Dèbata sipaluahken aku, dak ngo aku mengharap baMu.

⁶Dak èngèt mo mendè basa bak masèh atèMu, alè JAHOWA, sinituduhkenmu i mulana nai.

⁷Ampuni mo dosa bak kesalahen kenaposoenku, èngèt mo aku rembang mi masèh bak mendè basaMu.

⁸Kumerna permendè basa ngo JAHOWA janah adil, Ia petuduhken dalan bai kalak si laling.

⁹Iteggu-teggu JAHOWA ngo kalak sincerrep merukur, janah mengajarken bai kalak i hendakNa.

¹⁰Kalak simernèngèt padan bak patinNa ikekelengi janah setia ngo ibaing tabasa.

¹¹Alè JAHOWA, ampuni mo aku rembang mi padanMu kumerna mbelgah ngo dosangku.

¹²Iajarken JAHOWA ngo bai kalak simerkebiaren dalan sikennah idalani kalak i.

¹³Tettap ngo kalak i nduma, kempu-kempu kalak i mo mersidasaken tanoh pusakka.

¹⁴JAHOWA ngo supan-supan kalak simerkebiaren tabasa, ibagahken ngo bai kalak i takiNa.

¹⁵Dak menatap taba JAHOWA ngo matangku, kerna Ia ngo paluahken aku ibas permaraen nai.

¹⁶Tatap mo aku, janah masèh mo atèmu baku, kumerna kalak punjung ngo aku janah tertèndes.

¹⁷Dak makin tambah ngo bonek ukurku paluah mo aku ibas kepenjettenku nai.

¹⁸Datèken mo kinidersa bak kesusahenku, janah ampuni mo karina dosangku.

¹⁹Tengen mo nterremna musuhku; nggogo kalohon ngo atè kalak i baku.

²⁰Jamoti janah paluah mo aku, asa ulang termèla aku.

²¹Katerra pè mendè basa bak kebujuren mo dak mertaram aku, kumerna merkeposen taba kono ngo aku.

²²Alè Dèbata, dak paluah mo ummatMu ibas karina posekna nai.