Read Batak Dairi Psalm 27 Bible Online

Psalm 27 - Batak Dairi bible

Psalm 27

¹Psalm si Daud. JAHOWA ngo penendang baku janah keluahenku, oda lot sikukebiari. JAHOWA ngo pertahanenku, oda nèngè buradan aku.

²Mula ijuhap perjahat aku sinaing memunuh aku, kalak i ngo terdengdeng bana tergempang.

³Mula pè ikubu bala pergunggung aku oda mbiar aku. Tukasi nola pè mpustak geraha mengalo aku, dak tong ngo pos atèngku.

⁴Pellin sada ngo kupido bai JAHOWA, pellin èn ngo kessa kupergeddo: merian i Bages JAHOWA sidekkah nggelluhku, lako menjalo mendè basa JAHOWA dekket mengido peddahNa.

⁵Ikelumkumi JAHOWA ngo aku tikan tersessak; Iboniken ngo aku ibagasen BagesNa, janah merembah aku mi babo delleng batu.

⁶Bagèndari mennang ngo aku meraloken musuh sikulilingku, nai ibagasen oang-oang kupèlèken pèlèen lias atè i BagesMu; naing merendè ngo aku bak memoji JAHOWA.

⁷Ialè JAHOWA, dengkohken mo mula dilo-dilo aku baMu, masèh mo atèmu baku janah aloi mo aku!

⁸Nimu ngo, “Roh mo kono menembah Aku.” Kualoi mo, “Ndor mo aku roh, alè JAHOWA; ulang ko ciboni baku nai.”

⁹Ulang ko melaga bana menulak naposoMu, kumerna Kono ngo sienggo mengurupi aku. Ulang capakken barang pè itadingken kono aku, alè Dèbata, sipaluahken aku.

¹⁰Tah pè itadingken bapa bak inang aku, ijamoti Dèbata ngo aku.

¹¹Tuduhken mo lemmo atèMu baku, alè JAHOWA, teggu-teggu mo aku i dalan mpènter, kumarna nterrem kalohon ngo musuhku.

¹²Ulang sohken aku mi cubellek alongku, simenjuhap aku merkitè luap dekket asup.

¹³Tok ngo ukurku kennah mengakapi mendè basa JAHOWA ibas nggelluhku i dunia èn.

¹⁴Mengharap mo taba JAHOWA, pememmes janah petegguh mo ukurmu; uè, mengharap mo taba JAHOWA!