Read Batak Dairi Psalm 28 Bible Online

Psalm 28 - Batak Dairi bible

Psalm 28

¹Psalm si Daud. Ialè JAHOWA, taba kono ngo aku dilo-dilo, Kono ngo menampati aku, dengkohken mo dilo-dilongku. Mula sip ngo Kono merimbangken aku, tosè bagè kalak sisusur mi liang pendèbaen mo aku.

²Dengkohken mo pengidoenku mula pingko-pingko aku mengido urup, janah pekèkèken tanganku mi BagesMu simbadia.

³Ulang lentem aku rasken dekket kalak nandolak-ndalik, rasken kalak simengulaken kejahaten. Selloh ngo dengkohen kalak i mengerana, tapi macik ngo ukur kalak i.

⁴Hukum mo kalak i kumerna ulah-ulah kalak i, kumerna kejahaten siniulaken kalak i. Hukum mo kalak i rembang mi pengelako kalak i; baing mo hukumen satimpal bai kalak i.

⁵Oda isuihken kalak i pemakin JAHOWA, bang kadè pè sinibahanNa. Nai Ihukum mo kalak i, janah mengeripasken kalak i soh sidekkah-dekkahna.

⁶Nipoji mo JAHOWA, kumarna enggo Idengkohken pengidoenku.

⁷JAHOWA ngo menjamoti bak mengampini aku, tok ngo ukurku baNa. Ia ngo mengurupi dekket peloloken ukurku, kupoji mo Ia merdengan endè lias atè.

⁸JAHOWA ngo merèken gegoh taba bangsaNa Isampati janah iperkinijuahi ngo raja sinipilihNa.

⁹Perkinijuahi mo bangsaMu, alè JAHOWA, pasu-pasu mo gennep kalak siniabinMu. Gabè sada kalak permakan mo kono bai kalak i, janah jamoti mo kalak i soh mi sidekkah-dekkahna.