Read Batak Dairi Psalm 31 Bible Online

Psalm 31 - Batak Dairi bible

Psalm 31

¹Psalm si Daud. Bai simenguluken perendè.

²BaMu ngo aku culèndung alè JAHOWA, ulang duè aku terdehèrep. Perkinijuahi mo aku kemulihken ketègerrenMu,

³dengkohken mo aku janah sudu mo paluah aku. Gabè delleng batu mo ko bangku bekkasku culèndung, bagè bèntèng ntegguh, bekkasku merkinijuah.

⁴Uè, tosè ngo Ko bagè delleng batu bak bèntèng ntegguh baku! Teggu-teggu mo aku rembang mi bagah-bagahMu.

⁵Paluah mo aku i jarat sinitogongken baku, kumerna Kono ngo bekkasku culèndung.

⁶Mi bagasen tanganMu kusohken diringku; Kono ngo paluah aku, alè JAHOWA, Dèbata si setia i.

⁷Ikecegoken kono ngo kalak simenembah dèbata sidèban; tapi ukum aku tok ngo bai JAHOWA.

⁸Merlolo atè ngo aku janah meroang-oang kumerna dak tong ngo ngkelleng atèmu baku. Itengen kono ngo kinidersangku janah idatèken kono ngo kesusahenku.

⁹Oda ngo ibelli kono aku itaban musuh, tapi ibakinken kono ngo aku ndorok mi jèhè mi julu.

¹⁰Dak masèh mo atèmu baku, alè JAHOWA, kumerna ibagasen kesusahen ngo aku; mbin-mbin matangku kumerna dak tangis, ndalmeh ngo daging bak tendingku.

¹¹Pukpuk irendung kinidersa ngo nggelluhku, suntuk tahun dak pehehui ngo aku. Moru gegohku kumerna kepersukenku, bang tulan-tulanku pè gabè merampek.

¹²Gabè sitertabaen ngo aku bai karina musuhku, bang taba dengan kundulku. Karina simenandai aku tersengget mula idah aku, mperrus ngo kalak i mula pejumpa dekket aku i tengah ndalan.

¹³Ilupaken ngo aku bagè kalak sienggo matè, janah bagè ugasen sinicapakken.

¹⁴Barang i dikè dak lot maing buradan kudengkoh ngo kosik-kosik musuhku. Mersada taki ngo kalak i mengalo aku, janah mertaki lako memunuh aku.

¹⁵Tapi pos ngo atèngku baMu, alè JAHOWA, kumerna Kono ngo Dèbatangku.

¹⁶Dak ipehèdu-hèdu kono ngo aku; paluah mo aku bai musuhku nai, dekket bai kalak simengeletlet aku.

¹⁷Katerra pè lemmo mo atèmu taba naposomu èn; paluah mo aku kumerna masèh atèMu.

¹⁸Ulang duè aku termèla, alè JAHOWA, kumerna taba kono ngo aku dilo-dilo. Belli mo kalak perjahat termèla, janah sip susur mi kematèen.

¹⁹Sompel mo babah perluap simencèdurken kalak bujur ibagasen ndates ukur.

²⁰Sondel mertinèncuk mendè basaMu sinipehantarmu bai kalak simerpenguèi bamu. Karina kalak mengidah simerandal nibaingmu bai kalak siculèndung baMu.

²¹Iboniken kono ngo kalak i ibas pengkelungkumiMu meradepken siasat kalak perjahat; ikelungkumi kono kalak i ibas penjamotiMu; meradepken asung-asung musuh.

²²Nipoji mo JAHOWA! Mbelgah kalohon ngo masèh atèna baku, tikanna icingkoi janah ijuhap musuh aku.

²³Kumarna bingungku kudokdok nola enggo iambongken JAHOWA aku i hadeppenNa nai. Tapi enggo idengkohken pengidoenku tikan dilo-dilo aku mendahisa.

²⁴Kekelengi mo JAHOWA, alè karina ummatNa, isampati JAHOWA ngo kalak i si setia. Tapi kalak sindates merukur ihukum ngo mertuhu-tuhu.

²⁵Pepelcik janah petegguh mo ukurmu, kènè karina simengharap taba JAHOWA!