Read Batak Dairi Psalm 32 Bible Online

Psalm 32 - Batak Dairi bible

Psalm 32

¹Psalm si Daud. Endè peddah. Sayur ntua ngo jelma sienggo iampuni dosana, janah imaapken kesalahenna.

²Sayur ntua mo jelma siso pella ijujur JAHOWA kejahatenna, janah siso uè mengakkali.

³Sidekkah oda dèng kuakui dosangku, rennuk ngo aku kumerna derko-derko terrus ari.

⁴Mahar ari berngin idohken Ko ngo aku, alè JAHOWA, kerri gegohku, bagè isengkuk nggara mataniari.

⁵Nai kuakui mo dosangku baMu, oda lot nè kesalahenku sikuboniken. Kuputusken ngo lako mengakuisa baMu, janah iampuni Kono mo karina dosangku.

⁶Kumerna i gennep kalak simbersih merperkuren naing mo dak mersodip tikan menggong simpersah, asa mula mengerenren roh kesusahen, oda ia ianun.

⁷Kono ngo bekkas percibonienku, Ipaluah kono ngo aku ibas kepenjetten nai. Nai meroang-oang mo aku, kumerna Enggo ipaluah kono aku.

⁸Nina JAHOWA ngo, “Kutuduhken pè dalan sibellusenmu, kuteggu-teggu pè ko janah Kuajari.

⁹Ulang mo bagè kuda barang kalodè siso merpikiren, sikennah lebbè iteggu dekket kokang bak tinali asa menurut.”

¹⁰Mbuè ngo sempa kinidersa bai jelma perdosa; tapi ukum jelma simengharapken bai JAHOWA dak ngo ijamoti masèh atèNa.

¹¹Alè kènè jelma bujur, meroang-oang janah merlolo atè mo kènè kemulihken sienggo nibakin JAHOWA. Mersurak merlolo atè mo kènè, alè kènè karina jelma borjok.