Read Batak Dairi Psalm 33 Bible Online

Psalm 33 - Batak Dairi bible

Psalm 33

¹Kènè alè jelma borjok, meroang-oang mo kumerna sienggo nibaing JAHOWA; patut ngo kalak bujur memoji-moji.

²Mendokken lias atè mo taba JAHOWA merdengan kucapi, merendè mo kènè baNa merdengan oning-oning.

³Endèken kènè mo endè rimbaru bai JAHOWA, gerrit mo kucapi mendè-mendè janah mersurak mo kènè merèah-èah!

⁴Kettoken ngo karina kata JAHOWA; bujur ngo Ia ibas karina pemakinNa.

⁵Ikekelengi ngo kebujuren dekket kesèntengen; suberri tanoh ènda dom masèh atèNa.

⁶Ibaing JAHOWA perèntah, langit i mèter hana; mataniari, bulan dekket bintang ijadiken merkitè kataNa.

⁷Karina laè laut ipedèmpu mi sada bekkas, laut mbellang itambak i sada bendar.

⁸Belli mo suberri tanoh èn merkebiaren taba JAHOWA janah pengisi dunia pesangapkensa.

⁹Kumerna mengerana Ia, nai ihanaken mo karina; Iruapken perèntah, mèter lot mo karina.

¹⁰Isondati JAHOWA ngo taki bangsa-bangsa, Isomadaken mo niat kalak i.

¹¹Tapi taki JAHOWA hot merdalan, rancangenNa ntegguh soh sidekkah-dekkahna.

¹²Sayur ntua ngo bangsa simemakin JAHOWA gabè Dèbatana, sayur ntua ngo bangsa sinipilihNa gabè milikNa!

¹³Itatap JAHOWA ngo i sorga nai mi terruh, janah idah ngo karina jelma manusia.

¹⁴I tahtaNa nai iperdimata JAHOWA karina simengiani tanoh èn.

¹⁵Ia ngo simenempa ukur kalak i, janah ibettoh nasa ulah-ulah kalak i.

¹⁶Oda ngo mennang raja kemulihken nterrem soridadu. Oda maluah soridadu kumernaken gegohna.

¹⁷Kuda oda terasangken lako mennang, gegohna mengentuda mak ndorok paluahken.

¹⁸Ijamoti JAHOWA ngo gennep kalak simenguèisa simengkeposi masèh atèNa.

¹⁹Ipaluah ngo kalak i i kematèen nai, janah menggeluhi kalak i tikan masa kelèhèen.

²⁰Nai kita mengharap taba JAHOWA, Ia ngo mengurupi bak menarapi kita.

²¹Meroang-oang ngo kita kemulihkensa janah percaya mi gerarna simbadia.

²²Katerra pè dak masèh mo atèmu bai nami, alè JAHOWA, kumerna mengharap baMu ngo kami.