Read Batak Dairi Psalm 34 Bible Online

Psalm 34 - Batak Dairi bible

Psalm 34

¹Psalm si Daud sinderrang ipakulah-kulah oda waras pikirenna.

²Dak naing mendokken lias atè ngo aku gennep tèk bai JAHOWA, janah oda meradi-adi memojisa.

³Dak naing gegah-gegah ngo aku kemulihken pemaing JAHOWA; katerra pè idengkoh kalak sitertèndes mo i janah meroang-oang ia.

⁴Pehangga mo JAHOWA rasken aku, aci mo rasken pesangapken gerarNa.

⁵Mersodip ngo aku taba JAHOWA, janah ialoi ngo bana ipaluah ngo aku ibas karina kebiaren nai.

⁶Mengharap tabasa ngo kalak sitertèndes bak merlolo atè, oda lot dalihen kalak i asa gabè mèla.

⁷Tenggo-tenggo ngo kalak mesial janah ialoi JAHOWA, ipaluah ngo ia ipas nasa kepenjetten nai.

⁸Kalak simenguèi ijamoti malaèkat JAHOWA, janah paluahken kalak i ibas permaraen nai.

⁹Akapken mo mendè basa JAHOWA, sayurntua ngo kalak situnandè baNa.

¹⁰Pesangap mo JAHOWA kènè alè ummatNa, kerna oda kurangen kadè jelma simenguèisa.

¹¹Singa-singa pè melèhè kumerna kurang pangaen; tapi kalak simenembah JAHOWA oda lot kurangen.

¹²Dengkohken mo, kènè alè anak-anak karina, kuajari kènè pesangapken JAHOWA.

¹³Sèkel ngo kènè nggeddang umur ndè janah mengerasai simerandal?

¹⁴Ulang ruapken kata-kata jahat, janah ulang ko nggèut mengoto-ngotoi.

¹⁵Pedaoh dirimu ipas sijahat nai, ulaken simerandal, kerencetken mo damè sinasa tuk gegohmu.

¹⁶Iperdimata JAHOWA ngo kalak siborjok, idengkohken ngo mula dilo-dilo kalak i mengido urup.

¹⁷Tapi ialo ngo kalak simengulaken jahat; mula matè kalak i, ndor ngo kalak i ilupaken.

¹⁸Mula tenggo-tenggo kalak borjok, idengkohken JAHOWA, janah paluahken kalak i ibas nasa kesusahen nai.

¹⁹Njolmit ngo JAHOWA bai kalak simernongalè; janah iperkinijuahi ngo kalak sindalmèh.

²⁰Mèduk ngo sitahanen kalak bujur, tapi ipaluah JAHOWA ngo ia i sidi nai karina.

²¹Dak ngo ijamoti JAHOWA dagingna sada poda lot ipenggelken tulanna.

²²Matè ngo perjahat kumarna kejahatenna, ihukum ngo kalak simernggogo atè midah siborjok.

²³Ipaluah JAHOWA ngo gennep naposo-naposona; oda ihukum siculèndung baNa.