Read Batak Dairi Psalm 35 Bible Online

Psalm 35 - Batak Dairi bible

Psalm 35

¹Psalm si Daud. Alè JAHOWA alo mo kalak simengalo aku, juhap mo kalak simenjuhap aku.

²Buat mo utar-utar bak tambeng-tambengMu, janah kèkè mo mengurupi aku.

³Pèkèkè mo kujur sinanè bak boringenMu lako mengalo kalak simengayak aku. Ruapken mo taba aku magahken Kono ngo paluahken aku.

⁴Belli mo kalak sinaing memunuh aku italuken janah ipemèla. Belli mo kalak simertaki mengalo aku barat-burut mak ibettoh julmungenna.

⁵Belli mo kalak i iburu malaèkat JAHOWA, bagè uhut ikabangken angin.

⁶Belli mo kalak i iletlet malaèkat JAHOWA i dalan gellap janah ndalit.

⁷Datina ngo kalak i menogongi aku barang mengkurak geddung lako menangkup aku.

⁸Belli mo sempa kinimago bai kalak i siso pengèdeppen. Belli mo kalak i tertangkup ibas togong-togongna sendiri nai ndabuh janah binasa.

⁹Nai mersurak-surak mo aku kumerna JAHOWA, lolo ukurku kumerna ipaluah ngo aku.

¹⁰Ibas nasa perukurenku nai ningku mo, “Alè JAHOWA, oda lot codi bagè kono! Ipaluah kono ngo sindotè bai kalak simergegoh nai, kalak ncor bak ndersa bai simenèndessa nai.”

¹¹Kèkè mo saksi-saksi jahat mengalo aku, janah menukasi aku mengulaken siso kubettoh.

¹²Kebujuren ibales kalak i dekket kejahaten; lenneng ngo aku ibagasen pendellèen.

¹³Tikan sakiten kalak i, bonek ngo aku janah oda mangan; tungkuk ngo aku mersodip,

¹⁴tosè bagè menodipken sada kalak dengan sibeltek barang sada kalak supan-supan. Tungkuk ngo aku menangisi kalak i, bagè cara menangisi inangku sendiri.

¹⁵Tapi tikan susah aku, lolo ngo kalak i, janah renren mengalo aku. Mèkkah-èkkah mo kalak i merdalan lako mengelèai aku.

¹⁶Pukpuk ngo kalak i mengerèhè-rèhè kalak èangen janah menengen aku ibagasen nggogo.

¹⁷Soh ndigan, alè JAHOWA, soh ndigan Kono pellin menatap-natap sambing? Paluah mo aku i penjuhap kalak idi nai, pelluah mo kessahku bai singa-singa i nai.

¹⁸Nai kudokken mo lias atè baMu i tengah-tengah ummatMu janah memoji gerarMu ibagasen perpulungen kalak i.

¹⁹Ulang duè aku ipergait-gaitken kalak simemusuhi aku oda lot sebabna. Ulang belli aku isuraki kalak simerceggo atè baku oda lot dalanna.

²⁰Oda lamlam rana kalak i; mertaki ngo kalak i menipu nggelluh kalak mènak.

²¹Mersurak-surak ngo kalak i taba aku janah mendokken magahken enggo idah kalak i perulanku.

²²Tapi ukum Kono alè JAHOWA, enggo idah ko; ulang mo ko sip, alè JAHOWA, ulang ko ndaoh baku nai.

²³Kèkè mo ko menampati perkarangku, alè Dèbatangku janah JAHOWAku, urupi mo aku!

²⁴Bèla mo aku, kumerna ntèger ngo ko, alè JAHOWA, ulang belli musuh menuraki aku.

²⁵Ulang belli kalak i mendokken ibas ukurna, “Tuahna mo, enggo sidungi kessahna. Enggo saut sinipergeddo ukurta!”

²⁶Baing mo kalak sitoko iakap menengen kinidersangku gabè bingung janah termalu. Baing mo kalak sintunggang taba aku ilèai janah ipemèla.

²⁷Katerra pè jelma sinaing mengidah aku ibenarken mersurak janah meroang-oang. Katerra pè dakdak idokken kalak i mo, “Mahantu kalohon ngo sangap JAHOWA! Ipergeddo ia ngo keluahen naposoNa!”

²⁸Nai kusukutken mo ketègerrenMu, janah memoji Kono suntuk ari.