Read Batak Dairi Psalm 36 Bible Online

Psalm 36 - Batak Dairi bible

Psalm 36

¹Bai simenguluken perendè. Bai si Daud nai, naposo JAHOWA.

²Dak mengerana ngo kejahaten ibas pusuh peratèen kalak perjahat, sandok oda lot ikebiari ia Dèbata.

³Iètong ia ngo dirina mahantu, gabè oda itandai ia kesalahenna, janah oda mengketcegokensa.

⁴Jahat ngo pengeranaenna janah dom ukur bècuk, oda lot nèngè iulaken simendè bak siterpoji.

⁵I pedemmen pè itakiken ngo kejahaten; oda lot nèngè perulaenna simerandal, sinjahat mak nè itulak.

⁶Alè JAHOWA, nasa dates langit ngo masèh atèMu, janah soh mi hembun ngo dates kinibujurMu.

⁷Nasa dates delleng ngo mendè basamu, janah ketègerrenMu nasa bages laut; dak ipermudu-mudu kono ngo jelma bak pinakan alè JAHOWA.

⁸Mahargana i masèh atèMu, alè Dèbata, ibas terruh kabengMu ngo jelma mercilèndung.

⁹Puas ngo iakap kalak i menjaloken pangaen simerlebbih-lebbih i BagesMu, bak ènumen ibas laèMu sipemalumken idi nai.

¹⁰Kono ngo benna kenggeluhen karina singgelluh, ibagasen binendangMu ngo kami mengidah sincihur.

¹¹dak tong mo masèh atèmu bai kalak simenandai kono, janah memakin simerandal bai kalak simbersih merperukuren.

¹²Ulang duè aku ikubu kalak sindates merukur, barang pè ipuar kalak perjahat.

¹³Idah mo, enggo ndabuh kalak simengulaken kejahaten, tertembem ngo kalak i janah mak nèngè ndorok kèkè.