Read Batak Dairi Psalm 37 Bible Online

Psalm 37 - Batak Dairi bible

Psalm 37

¹Bai si Daud nai. Ulang bulisah kemulihken jelma jahat, ulang cian taba kalak simengulaken salah.

²Kumerna ndor ngo kalak i mersep bagè dukut, janah males bagè suan-suanen meratah.

³Percaya mo taba JAHOWA, janah ulaken mo simerandal, merian mo i nagerri i janah dak setia.

⁴Tulusi mo kesennangenmu taba JAHOWA asa iberrèken sinipergeddomu.

⁵Sohken mo nggelluhmu bai JAHOWA, harapke mo Ia, asa iurupi kono.

⁶Asa ipetarar kesetiaenmu bagè sinterrang, dekket ketutusenmu bagè mahar.

⁷Pèma mo JAHOWA ibagasen ukur tennang sobar mo ko memèma soh mi bakunè sibaingenna. Ulang bulisah kemulihken kalak simerhasil nggelluhna, barang simengulaken akkal-akkal.

⁸Ulang melaga dekket nggerger pusuh, pellin merembahken cilaka ngo idi.

⁹Kerna naing iripasken ngo kalak simengulaken jahat, tapi kalak simerkeposen taba JAHOWA ngo sidasa tanoh i.

¹⁰Ndor ngo mersep kalak perjahat, mula itulusi, oda lot nè ia.

¹¹Kalak sincerrep merukur ngo mersidasaken tanoh i, janah mengerasai kiniduma mertinèncuk.

¹²Kalak perjahat menura-nurai jahat taba kalak bujur, janah nggogo atèna menengensa.

¹³Tapi itertabai JAHOWA ngo jelma jahat, kumerna ibettoh enggo njolmit perdung kalak i.

¹⁴Isintak kalak perjahat ngo peddang janah mencèkkèrken panah lako memunuh kalak ncor bak mpersah, lako mengerabbatken kalak simendè merpengelako.

¹⁵Tapi jelma jahat ijuluk peddangna sendiri, baor panahna ipenggelken.

¹⁶Cituk pè ugasen kalak simerpengelako selloh, mahargaen ngo i daripada gaya-guyu silot bai perjahat.

¹⁷Kumerna ibohokken JAHOWA mo kuasa kalak perjahat, tapi ijamoti ngo jelma sibujur.

¹⁸Kalak borjok ijamoti JAHOWA ngo nggelluhna, hot ngo milik pusakka kalak i soh mi sidekkah-dekkahna.

¹⁹Oda pella ndersa iakap kalak i tikan kepenjetten, cukup ngo bai kalak i tikan masa kelèhèen.

²⁰Tapi binasa mo kalak perjahat, mago mo musuh JAHOWA bagè bunga i jampalen, mersep mo kalak i ibagasen cèmber.

²¹Merinjam ngo kalak perjahat janah oda ibalikken, tapi ukum kalak bujur memerèken merkitè nterrang abè.

²²Kalak sinipasu-pasu JAHOWA ngo mengiani tanoh i, tapi ukum kalak sinisumpahenNa ipuari.

²³Itatang JAHOWA ngo jelma i dalan sikennah dalanenna, Ipergegohi ngo jelma mula nggelluhna rembang baNa.

²⁴Mula ndabuh, oda pella ugahen mparah ia, kumerna icèkèp JAHOWA ngo tanganna.

²⁵Kessanai aku anak perana soh tua-tua, oda nung kuidah jelma bujur itadingken JAHOWA, barang gabè pengido-ngido pinemparna.

²⁶Dak ngo ia pejualken janah sitau memerrè, janah dukak-dukakna gabè pasu-pasu bana.

²⁷Tadingken kejahaten, ulaken simerandal, nai iiani pinemparmu mo tanoh i soh sidekkah-dekkahna.

²⁸Kerna ikekelengi JAHOWA ngo perulaen selloh janah ntèger, oda ibelli jelma setia i rapar. Ijamoti ngo kalak i soh mi sidekkah-dekkahna, tapi rabbat ngo pemparen kalak perjahat.

²⁹Kalak borjok ngo mersidasaken tanoh èn, janah mengiani soh mi sidekkah-dekkahna.

³⁰Bijak ngo mengerana kalak bujur, dak ntèger ngo ia i pengerananna.

³¹Merian i pusuh peratènna ngo Patien Dèbatana, oda ngo menurimpang i sidi nai ia.

³²Jelma bujur ientip jelma jahat simenulusi dalan lako memunuhsa.

³³Tapi oda ipadiat JAHOWA ia ndabuh mi tangan musuhna, barang ihukum tikanna irungguken ia.

³⁴Harapken mo JAHOWA janah iuèi perèntahNa nai ipebangkit mo ko lako mersidasaken tanoh i, idah ko mo kalak perjahat itumpatken.

³⁵Nung ngo kuidah sada kalak perjahat ngkasah merbual; tosè ngo i bagè kayu meratah janah merurat mbages.

³⁶Tikan mentas aku, oda lot nèngè ia, kutulusi ia, tapi oda jupa aku nè ia.

³⁷Perdatèken mo kalak bujur janah kalak perukur tobok, kalak simengkelemoken damè sidasa ari podi.

³⁸Tapi kalak perdosa itumpatken; pinempar kalak i pè gabè iripasken.

³⁹Iperkinijuahi JAHOWA ngo kalak borjok, janah menjamoti kalak i tikan kepenjetten.

⁴⁰Mengurupi ngo ia janah paluahken kalak i, janah paluahken kalak i bai jelma-jelma jahat nai, kerna culèndung bana ngo kalak i.