Read Batak Dairi Psalm 38 Bible Online

Psalm 38 - Batak Dairi bible

Psalm 38

¹Psalm si Daud tikan memèlèken pèlèen pernèngèten.

²Alè JAHOWA, ulang hukum aku ibagasen lagaMu, ulang siksa aku ibagasen pungurMu.

³PanahMu menelpus mengugahi badanku, mbotong kuakap tanganMu mendendenni aku.

⁴Sakit mpiah ngo aku kumerna lagaMu; oda lot nè sinjuahna ipas dagingku kumerna dosangku.

⁵Lenneng ngo aku ibas renren kesalahenku, mbotongsu ngo kuakap boban dosangku.

⁶Mernanah ngo ugah-ugahku janah bau macik, kumerna enggo mengulaken kemotoen aku.

⁷Tungkuk ngo aku janah mukung, suntuk ari mendennu aku janah bonek.

⁸Mègar menutung dagingku, oda lot sinjuahna dagingku.

⁹Rengngè kuakap janah kerri gegohku, mendeherreng aku kumerna susah ukurku.

¹⁰Alè JAHOWA, ibettoh Kono ngo sinipergeddongku oda lot mboni baMu pehehuingku.

¹¹Rembekbekken ngo pusuhku, mbalang gegohku, enggo gabè ramben matangku.

¹²Sincelketku menisi kumerna sakitku, bang dengan-denganku menadingken aku.

¹³Kalak simertaki naing memunuh aku menogongi aku; sinaing mencilakaken aku mengasup naing petumpatken aku.

¹⁴Tapi bagè kalak sitongkik ngo aku oda merpendengkoh, bagè kalak sipekkak oda mongkam.

¹⁵Tuhu, bagè kalak sitongkik ngo aku, janah kumarna i oda menonja aku.

¹⁶Tapi mengharapken kono ngo aku, alè JAHOWA, janah kono alè JAHOWA Dèbatangku mengaloi aku.

¹⁷Ulang duè musuhku lolo menengen kepersukenku ulang duè kalak i merkata bual mula ringgodoren aku.

¹⁸Enggo naing geppah aku, pukpuk ngo mpiah kuakap.

¹⁹Kuakui ngo dosa-dosangku; rembekbekken ngo aku mernèngèt kesalahenku.

²⁰Mèduk janah mergegoh ngo kalak simengkecegoken aku nggogo atè kalak i midah cara nggelluhku.

²¹Kalak simemalesken simerandal ali kejahaten memusuhi aku kumerna kuulaken simerandal.

²²Alè JAHOWA, ulang tadingken aku, ulang ndaoh baku nai, alè Dèbatangku.

²³Sudu mo roh mengurupi aku, alè JAHOWA sipaluahken aku.