Read Batak Dairi Psalm 39 Bible Online

Psalm 39 - Batak Dairi bible

Psalm 39

¹Psalm si Daud. Bai simenguluken perendè. Bai si Jedutun.

²Dok atèngku, “Naing kujaga diringku asa ulang merdosa merkitè dilahku. Oda nggèut aku mengerana sidekkah njolmit dèng kalak perjahat.”

³Sip ngo aku bana nono gabè merembahken rogi mi diringku. Janah sitahanenku muat mberratna;

⁴aku ikelungkumi ringgodoren ntengam. Makin kupikirken muat susahna ukurku; dungna kudokken mo,

⁵“Alè JAHOWA, bagahken mo ndigan ajalku asa kubettoh joppok kalohon ngo umurku.”

⁶Joppokna i ibuhul Ko umurku! Oda lot artina baMu sibaren nggelluhku. Situhuna, bagè penempul kessah sambing ngo kessa jelma,

⁷memellus sambing ngo nggelluhna bagè lèndung. Magosia bagi sambing karina penggormitna; itèmbun ngo harta, tapi oda ibettoh isè naing memakè.

⁸Bagèndari kadè sikupèma, alè JAHOWA? Kono ngo sikuharapken.

⁹Paluah mo aku i karina dosangku nai, ulang padiat aku gabè sirèhèen kalak leppik.

¹⁰Sip ngo aku janah oda kubuka babahku, kumerna kono ngo menjerra aku.

¹¹Agoi mo hukum nibaingmu bangku nai kumerna enggo naing matè aku kemulihken pengeligasmu.

¹²Ihukum janah ijerra kono ngo jelma; kumerna kesalahenna bagè ngitngit ilicatken kono kadè simahargana bana. Situhuna bagè penempul kessah sambing ngo jelma.

¹³Dengkohken mo sodipku alè JAHOWA, perdatèken mo pengidonku; ulang ko sip mula tangis aku. Bagè karina empungku, pellin sinempas sambing ngo aku mendampin baMu.

¹⁴Ulang lolahi aku, asa sennang kuakap situk, sinderrang mak dèng aku berkat janah maknè lot.