Read Batak Dairi Psalm 40 Bible Online

Psalm 40 - Batak Dairi bible

Psalm 40

¹Psalm si Daud. Bai simenguluken Perendè.

²Ibagasen sobar kupèma pengurupi Jahwa; nai idatèken mo aku janah mendengkohken dilo-dilongku.

³Iteggu ngo aku ibas luhung permaraen nai, ibas kubang rabang nai. Ibaing ngo aku mi babo uruk batu, gabè tettah perdalanku.

⁴Iajari ngo aku mengendèken endè rembaru, endè pemojien bai Dèbatanta. Mèduk kalak mengidahsa janah gabè merkebiaren, gabè percaya bai JAHOWA.

⁵Sayurntua ngo jelma sipercaya bai JAHOWA, siso dekket menembah dèbata siso tuhu barang mengido urup taba kalak tunggang.

⁶Alè JAHOWA, soh buèna sinibakinMu bai nami, alè JAHOWA Dèbatangku, ukum Ko oda lot codina! Mèduk ngo takiMu maingken bengap kami, malot tersukutken karinana.

⁷Oda ngo lemmo atèna pèlèen bak pèlèen hantaren, oda itunggu ko pèlèen situtungen bak pèlèen kesasaen dosa. Tapi enggo iberrèken kono baku pènggel sindorok mendengkoh soraMu.

⁸Nai ningku mo, “En ngo aku, ibas lapihen tersurat ngo baku.

⁹Lolo ngo aku mengulaken sinikelemokenMu, alè Dèbata, kupennep ngo patinMu ibagasen ukurku.”

¹⁰I pulungen ummatMu kubagahken sukuten lolo atè magahken enggo ipaluah Kono kami. Oda meradi-adi sukuten lolo atè i kubagahken, ibettoh Kono ngo karinana i alè JAHOWA.

¹¹Oda kupennep Sukuten Keluahen idi ibagasen ukur, dak kuberitaken ngo pengurupi bak setiaMu. Oda ngo sip aku i hadeppen pulungen ummatMu, tapi kutingtingken ngo masèh bak kebujurenMu.

¹²Alè JAHOWA, ulang mpostep masèh atèmu baku; jamoti aku merkitè masèh atè bak kebujurenMu.

¹³Irenren matcam bagè mara ngo aku, oda terbilang buèna. Dak iletlet dosa-dosangku ngo aku sanga mak nèngè merpendidah aku. Buèna lampo bagè buk sini takalku, memaingken mendellè aku.

¹⁴Alè JAHOWA, paluah mo aku, alè JAHOWA sudu mo urupi aku!

¹⁵Belli mo kalak sinaing memunuh aku italuken janah mperrus oda ibettoh temburenna. Belli mo kalak menuraki keliahenku murtut mi podi janah ilèai.

¹⁶Belli mo kalak simenaba-nabai aku gabè tersengget janah mèla.

¹⁷Katerra pè karina mo kalak simenembah Kono mersampang atè janah meroang-oang, janah karina simengketedohken keluahen siroh baMu idi nai pukpuk mendokken, “Mersangap kalohon ngo JAHOWA!”

¹⁸Ncor ngo aku janah ndalmeh, tapi isarihken JAHOWA ngo aku. Kono ngo pengurupi janah paluahken aku, ulang pelaun, alè Dèbatangku!